Festa e Pashkës Ortodokse ka sjellë fluks të shtuar në hyrje të pikës kufitare të Kapshticës edhe gjatë 24 orëve të fundit.
Shtetasit shqiptarë që jetojnë dhe punojnë në Greqi po rikthehen ne vendlindjen e tyre për të festuar pashkën dhe pse jo për të shfrytëzuar ditët e pushimeve.
Në Kapshticë kanë hyrë 6942 dhe kanë dalë 3274 shtetas. Në Qafë Thanë kanë hyrë 4070 dhe kanë dalë 3712 shtetas.
Ndërkohë, orët e pasdites së 4 majit është vënë re një ulje e fluksit, ndërsa autoritetet thonë se po punohet me 3 sportele në hyrje dhe 3 në dalje të Kapshticës.
Në orët e pasdites, fluksi në pikën e kalimit kufitar ka rënë. Policia Kufitare e Korçës në në një reagim për mediat thotë se nuk ka radhë kilometrike dhe se aktualisht po punohet me 3 sportele në hyrje dhe 3 në dalje.
"Në lidhje me një lajm të publikuar për radhë kilometrike, në Pikën e Kalimit Kufitar Kapshticë, ju sqarojmë se, lajmi është i pavërtetë pasi fluksi ka qenë normal dhe nuk janë krijuar radhë të gjata. Aktualisht në dalje të Republikës së Shqipërisë, po punohet me 3 sportele dhe në hyrje me 3 sportele të tjera dhe lëvizja vijon normalisht. Drejtuesit e Drejtorisë Vendore për Kufirin dhe të Stacionit të Policisë Kufitare Kapshticë janë në kontakt të vazhdueshëm me palën greke, e cila ka shtuar sportelet, për të menaxhuar fluksin e lëvizjes dhe shmangur radhët", njofton policia.
