Aq shumë ka ndikuar vendimi i Departamentit të Shtetit për Berishës, sa edhe ata që janë frenuar nga një polemikë edhe ndoshta legjitime me doktorin, këtë herë nuk se po e kursejnë.
Ka bërë sot lajm përgjigja që Aleksandër Çipa i ka bërë në murin e tij qytetarit digjital, pasi ish-Presidenti e Kryeministri rinisi sulmit ndaj Ardian Çipës që u emërua drejtor i policisë së Korçës.
Sulmet e doktorit ndaj Ardian Çipës kanë qenë të hershme, sapo oficeri i njohur i policisë është vënë në poste të rëndësishme si ai i drejtorit të Policisë së Tiranës apo të Drejtorit të Trafiqeve në Drejtorinë e Përgjithshme.
Logjika e do që një politikan i nivelit të Berishës të mos merret me zyrtarë apo oficerë policie, por kjo ndodh, pasi njerëz të klanit të doktorit që kanë lidhje dhe fuqi në qarqet e familjes Berisha në këtë sektor, sulmojnë këdo që njerëz të sërës të tyre ua kërkojnë.
Pra shërbën si shantazhues mediatik. Ardian Çipa është një oficer policie i brezit të pas 90, që pjesën më të madhe të karrierës së tij e ka kryer kur PD ka qenë në pushtet. Çipa, ka familjarë të tij anëtarë e zyrtarë të PD-së në qendër e bazë. Madje xhaxhai i tij, ka hapur mitingun në një nga mitingjet e Lulzim Bashës në kohën e çadrës.
Por Aleksandër Çipa nuk e kishte sulmuar asnjëherë Berishën, por si drejtues i Unionit të Gazetarëve ka dhënë çmime për gazetarë oborri që kanë sulmuar të vëllanë, Ardianin, i cili gjatë kandidimit për drejtues të BKH-së kaloi provën e Poligrafit, çka e kanë bërë një numër i vogël oficerësh, është trajnuar në SHBA, ndërkohë që është pritur nga Papa Francesku, gjatë vizitës së tij në Shqipëri.
Që të jemi të qartë, nuk se një zyrtar me këto arritje nuk duhet të kritikohet apo sulmohet, përkundrazi. Një shoqëri demokratike ka hapësirë të gjërë për kritika, akuza, etj. Por Berisha sulmon në kohë e hapësirë për arsye të caktuara shantazhi.
Ja sot, Sali Berisha sulmoi Erion Braçen pa asnjë lloj arsyeje e logjike për dosjen që SPAK ka hapur në Bashkinë e Lushnjes. Jo se Braçe apo kushdo zyrtar është i paprekshëm, por nuk kishte asnjë lloj lidhje ajo që Berisha donte të bënte për numrin dy të qeverisë me hetimin e nisur. Stononte pastërtisht.
Gjithsesi, pikërisht ky stonim apo edhe komentet që kanë ndjekur prej ditësh, e jo vetëm sot qytetarin digjital, janë një nga pasojat e rëndësishme të vendimit të DASH. Janë një lloj antidote që kanë ndihmuar në shoqëri për tu shpërlarë nga toksikimi i gjatë i një fenomeni gërryes të 30 vjetëve tranzicion…
