Paul Pogba shikon ‘dritë në fund të tunelit’. Mesfushori i Juventusit ka marrë një lajm të mirë nga CAS i Lozanës (Gjykata e Arbitrazhit Sportiv), i cili ka reduktuar dënimin e tij për përdorim dopingu. Në fillim dënimi ishte 4-vjeçar ndërsa sot në Zvicër është reduktuar në 18 muaj.
CAS ka afruar kështu ndjeshëm datën e një kthimi të mundshëm në fushën e lojës. Futbollisti është endë nën kontratë me Juventusin dhe mund të japë kontributin për këtë ekip duke filluar që nga ky sezon, me rikthimin që parashihet në fundin e marsit 2025.
Pogba ka konfirmuar gjithçka në kanalet e komunikimit, duke thënë se për të mbaroi një makth.
‘’Më në fund makthi mbaroi, mezi pres ditën kur mund të ndjek ëndrrat e mia përsëri. Kjo ka qenë një periudhë tejet shqetësuese në jetën time sepse gjithçka për të cilën kam punuar aq shumë është vënë në pikëpyetje’’, tha Pogba mes të tjerash.
