Ish-deputeti i PD-së, Bardh Spahia i ka kthyer përgjigje ministres së Shëndetësisë, Ogerta Manastirliu e cila thumboi kryedemokratin Lulzim Basha, për lapsuset, ndërsa i kërkoi që në këto momente duhet të jemi të gjithë bashkë për të kaluar situatën e vështirë të pandemisë.
Ndërkohë Spahia i është përgjigjur në rrjetet sociale, duke thënë se ministrja duhet t'i lërë fjalët dhe të bëjë punë konkrete që mbrojnë bluzat e bardha dhe qytetarët.
Më tej Spahia ka kërkuar shtimin e numrit të testimeve me të paktën 2500 në ditë pasi sipas tij me fjalë e shfaqje nuk mbrohen qytetarët nga koronavirusi.
"Pandemia nuk administrohet me fjalë, foto apo video nga kolltukët e ngrohta dhe të sigurta të ministrisë së shëndetësisë. Prandaj, lëri fjalët dhe fillo të bësh punë konkrete që mbrojnë mjekët, infermierët, mësuesit dhe qytetarët, ndihmojnë të sëmurët dhe familjet e tyre dhe bëjnë më të sigurta spitalet dhe shkollat.
Shtoni numrin e testimeve në të paktën 2500 në ditë dhe gjurmoni kontaktet! Furnizoni me maska falas 40% të qytetarëve që jetojnë me 4 dollarë në ditë!
Pajisni spitalet me aparate oksigjeni dhe medikamentet anti-Covid, me pajisje mbrojtëse për mjekët dhe infermierët! Ofrojuni falas paketën e trajtimit ambulator qytetarëve të sëmurë që trajtohen në shtëpitë e tyre!
Furnizoni me ujë 70% të shkollave që u mungon uji, me materiale higjenike! Me fjalë, me shfaqje dhe me video nuk mbrohen dhe as shërohen qytetarët e sëmurë, as nuk ndalet përhapja e COVID.
COVID përmbahet me masa siç po marrin edhe vendet e rajonit", shkruan Bardh Spahia.
