Partia Demokratike dhe koalicioni PD-ADSHM i kërkon KQZ-së që t’i vërë në dispozicion pamjet filmike të të gjitha qendrave të votimit në vend të kërkuara prej saj në mënyrë të përsëritur dhe informacionin për kthimin e zarfeve të votave të diasporës, nëse janë bërë dorazi apo jashtë kanaleve të DHL-së.
Kjo kërkesë që mban datën 4 korrik në protokoll, që mes të tjerash vë në dijeni edhe faktorin ndërkombëtar të OSBE-ODIHR, përmban edhe ankesën ndaj kryekomisionerit Ilirjan Celibashi, se jo vetëm nuk i vë në dispozicion materialet e kërkuara, por edhe në shumë prej tyre pamjet filmike kanë prerje, ku pretendohet qëllimisht, si pjesa e procesit të votimit.
Kërkesa është dorëzuar nga përfaqësuesi ligjor i PD, Franc Nuri dhe pritet të shqyrtohet nga ana e KQZ-së.
PD dhe kryetari i saj, Sali Berisha, që pas ditës së zgjedhjeve kanë pretenduar farsën elektorale, manipulimin apo vjedhjen e zgjedhjeve të 11 majit, duke ndërmarrë edhe një mision ndërkombëtar për nxirjen e Shqipërisë deri në Parlamentin Europian, në Bruksel apo në Strasburg dhe te Asambleja e OSBE-së në Portugali.
Berisha ka pretenduar ‘trenin bullgar’, për të cilin deri tani nuk ka dhënë asnjë provë dhe nuk është zbuluar asnjë e tillë, teksa po shfaq pamje filmike edhe në konferenca me gazetarët, për procesin e numërimit.
KQZ fillimisht dhe më pas KAS e Kolegji Zgjedhor, ia ka rrëzuar shumicën e kërkesave, teksa edhe pranimi i numërimit të pjesshëm për disa qarqe, Tirana dhe Fieri të gjitha dhe Durrësi pjesërisht, më shumë po tregojnë vjedhjen e kandidatëve të PD-së brenda partisë, ndërsa nuk ka pasur ndryshime mandatesh mes subjektesh. Të trija shkallët kanë certifikuar rezultatin e 11 majit në 8 prej qarqeve dhe nga KQZ janë shpërndarë mandatet e deputetëve fitues për partitë garuese.
Kërkesa e PD-ADSHM, drejtuar KQZ-së
Komente
Kur i fitonte zgjedhjet Berisha a kishte rinumurim? A kishte venie ne dizpozicion te opozites te materialeve filmike?
Përgjigju