Pasi PD i kërkoi Komisionerit Shtetëror të Zgjedhjeve Ilirjan Celibashit, mbylljen e zyrës elektorale të PS-së në Delvinë pasi sipas PD është në shkelje të kodit elektoral, ka ardhur një reagim nga kandidati i PS në qarkun e Vlorës, Ardit Bido.
Përmes një video në rrjetet sociale, Bido thotë se Berisha doli sërish blof lidhur me akuzat për zyrën elektorale të PS në Delvinë. Sipas tij, përballë KZAZ-së ndodhet zyra e Partisë Demokratike dhe jo më larg se 100 metra është edhe zyra e kandidates së PD-së.
‘Bllofi i radhës i doktorit erdhi dhe në Trojë: kandidatja nuk shikon selinë e saj. O doktor, prapë bllof?! Çdo ditë do të merresh me mua? Nuk të del koha të merresh me qytetarët, por merresh me mua, çdo mëngjes, si detyrë e parë. Merr frymë, doktor! Sot zgjodhe Delvinën për të hedhur baltë. Trojë e quajmë ne që jemi të këtij qyteti, që e kemi në gjak, në zemër, në rrënjë. Dërgove një gocë të mirë të partisë, që s’ka lidhje me Delvinën, të sajojë një “tmerr” pranë KZAZ-së.
Na tregoi se aty ndodhet zyra jonë elektorale… por harroi të shikojë rrotull! Sepse përballë KZAZ-së ndodhet zyra e Partisë Demokratike. Edhe zyra e kandidates së PD-së, jo më larg se 100 metra. Doktor, të lutem, mos dil më bllof! Nuk po funksionon. Qytetarët janë më të zgjuar se kaq. E dinë vetë kush punon dhe kush bën teatër. Gënjeshtrat kanë këmbë të shkurtra. Dhe s’mbërrijnë dot në Parlament. Në Trojë, votojnë trojanët. Dhe ti e di shumë mirë kush do të votohet. S’ke ku të shkosh, përveçse përballë me mua. Mos u tremb, doktor. Do shihemi në Parlament. Deri atëherë’, thotë ai.
Komente
