Partia Demokratike ka shprehur sot shqetësimin lidhur me moskryerjen e analizave në QSUT.
Zëdhënësja e Departamentit Anti-korrupsion në PD, Genta Vangjeli publikoi një mesazh, i cili pretendohet se u është dërguar mjekëve, ku u kërkohet të kryejnë analizat vetëm për rastet urgjente, ndërsa pjesa tjetër të lihen për muajin e ardhshëm pasi është arritur ‘tavani financiar’ i përcaktuar në kontratën me koncesionarin që kryen analizat.
"Sipas emailit të brendshëm të QSUNT-së: ‘Tarifat e shërbimeve të pagueshme të koncesionarit kanë arritur 100% të tavanit buxhetor mujor. […] Prandaj që prej datës 25 Gusht deri 1 Shtator do të ofrohet shërbim laboratorik vetëm për rastet urgjente dhe shumë të rënda.’ Ky precedent i rrezikshëm tregon qartë se në sistemin aktual shëndetësor shqiptar, jeta e pacientëve është kushtëzuar nga kufizime financiare, të imponuara nga kontrata të dyshimta publike-private. Dhe ky nuk është rast i izoluar, por një shembull i qartë i degradimit të sistemit shëndetësor në vend. Prej kohësh janë raportuar mungesa të theksuara në barna, pajisje, dhe shërbime bazike, ndërkohë që fondet publike vazhdojnë të shpërdorohen në projekte luksoze dhe tendera të dyshimtë. PD kërkon me urgjencë: Të ndërpriten menjëherë praktikat që kufizojnë aksesin e qytetarëve në shërbime shëndetësore për arsye financiare. Të mbahet përgjegjësi institucionale dhe ligjore për këtë skandal dhe pasojat që mund të ketë për shëndetin e pacientëve. Të ri-orientohet buxheti publik drejt shëndetësisë dhe mbrojtjes së jetës së qytetarëve, jo drejt projekteve të panevojshme apo klienteliste. Në një shtet normal, shëndetësia është prioritet. Ndërsa në Shqipëri, jeta e qytetarëve po vendoset në rrezik nga një sistem i paaftë, i korruptuar dhe i kapur nga interesat private",- thuhej në reagimin e PD-së.
Po brenda ditës së sotme, erdhi reagimi i Qendrës Spitalore Universitare “Nënë Tereza”. ku thuhet se pretendimi i PD-së është i pavërtetë dhe i pabazuar.
"Shërbimi laboratorik në QSUT vijon pa asnjë ndërprerje, duke garantuar çdo ditë kryerjen e analizave për pacientët sipas nevojave të tyre mjekësore. Email-et e brendshme të komunikimit me stafin, të cilat janë interpretuar në mënyrë jokorrekte, nuk kanë lidhje me ndërprerjen e shërbimit, por me: Respektimin korrekt të protokolleve klinike dhe algoritmeve të frekuencës së kryerjes së testeve laboratorike sipas patologjive, si dhe menaxhimin me eficiencë të kostove dhe buxheteve të alokuara, në përputhje me praktikat e administrimit spitalor",- thuhet në përgënjeshtrimin e QSUT-së.
Mesazhi i publikuar nga Vangjeli
Qendra Spitalore Universitare “Nënë Tereza” ka reaguar lidhur me pretendimin e Partisë Demokratike se mjekëve i kërkohet të kryejnë analizat vetëm për rastet urgjente, ndërsa pjesa tjetër të lihen për muajin e ardhshëm pasi është arritur ‘tavani financiar’ i përcaktuar në kontratën me koncesionarin që kryen analizat.
QSUNT thotë se pretendimi i PD-së është i pavërtetë dhe i pabazuar.
“Shërbimi laboratorik në QSUT vijon pa asnjë ndërprerje, duke garantuar çdo ditë kryerjen e analizave për pacientët sipas nevojave të tyre mjekësore”,- theksohet në reagimin e QSUNT-së.
Reagimi i plotë i Qendrës Spitalore Universitare “Nënë Tereza”:
Në vijim të disa lajmeve të publikuara për ndërprerjen e shërbimit laboratorik pranë Qendrës Spitalore Universitare “Nënë Tereza”, sqarojmë se:
Ky lajm është i pavërtetë dhe i pabazuar. Shërbimi laboratorik në QSUT vijon pa asnjë ndërprerje, duke garantuar çdo ditë kryerjen e analizave për pacientët sipas nevojave të tyre mjekësore.
Email-et e brendshme të komunikimit me stafin, të cilat janë interpretuar në mënyrë jokorrekte, nuk kanë lidhje me ndërprerjen e shërbimit, por me:
-respektimin korrekt të protokolleve klinike dhe algoritmeve të frekuencës së kryerjes së testeve laboratorike sipas patologjive, si dhe menaxhimin me eficiencë të kostove dhe buxheteve të alokuara, në përputhje me praktikat e administrimit spitalor.
Theksojmë se volumi ditor i analizave dhe shpenzimet e përditshme të kryera janë të dhëna të aksesueshme nga kushdo ka interes në funksion të transparencës, ndaj ftojmë këdo të drejtohet në rrugë zyrtare QSUNT.
Përhapja e lajmeve të rreme dhe interpretimi i gabuar i komunikimeve zyrtare krijon panik të panevojshëm në popullatë dhe dëmton besimin ndaj shërbimeve tona. Prandaj, kërkojmë që çdo informacion të interpretohet dhe transmetohet me korrektësi.
Qendra Spitalore Universitare “Nënë Tereza”
Tiranë!
Komente
