Partia Demokratike prezantoi sot edhe programin elektoral për sportet, ku pikat kryesore që u deklaruan edhe nga kreu i saj Sali Berisha, ishin zhbërja e ligjit për sponsorizimet, aplikimin vetëm të shpërblimeve financiare për sportistët që fitojnë çmime dhe jo grada e spaleta ushtarakësh, si dhe dyfishim të buxhetit.
Por ajo që ra në sy në këtë takim sot (2 prill), ishte një deklaratë e kandidatit të PD-së, Salvador Kaçaj, ish-kryekomunar i Shëngjinit dhe ish-sportist.
Ai hodhi akuza ndaj eventit më të madh sportiv që pret vendi më 9 prill, “Giro D’Italia”, duke e quajtur si “tur biçikletash’ për të cilin po harxhohen miliona euro që përfitohen nga hajdutët, si dhe hodhi dyshime për pagesat me VKM të posaçme të qeverisë ndaj trajnerit të Kombëtares Shqiptare, brazilianit Silvinjo.
“Ky është një takim i rëndësishëm, sepse sporti është lënë pas dore, dua të them 2-3 gjëra pikante. Kryeministri ynë e ka përvetësuar edhe fanellën e kombëtares, është edhe trajner, buxheti për sportin është 1.6 milionë euro, për ca biçikleta që do vijnë nga Italia për një tur çiklistësh do japë 7 milionë euro. Pra shikoni vetëm këtë fakt, një akt korruptiv, një vjedhje e taksave të shqiptarëve. Pra 7 mln euro për ca hajdutë që vijnë nga Italia për një tur biçikletash. Ky premton që do japë edhe licenca për lojërat e fatit po s’i jep, se do t’i mbajë vetë në dorë. Sylvinho paguhet nga qeveria me VKM të posaçme, ka sjellë menaxherin e tij, vëllanë e tij, emëruar drejtor shumë të rëndësishme për një nga këto të lojërave të fatit”, u shpreh Kaçaj mes të tjerash.
Komente
