Policia e Lezhës ka identifikuar por ende nuk ka arritur të arrestojë tre personat që morën peng rojën e HEC-it, Dod Gjoka. Vetë i plagosuri gjatë marrjes në pyetje nuk i ka ndihmuar hetuesit, pasi është shprehur se kishte vetëm një konflikt të çastit me autorët. Nga veprimet paraprake të kryera, dyshohet se pengmarrja ka ardhur si shkak i situatës së tensionuar në Mirditë, ku banorët kundërshtojnë ndërtimin e hidrocentraleve në zonën e Kaçinarit. 35-vjeçari i dhunuar Ded Gjoka rezulton të jetë punonjës i sigurisë pranë kompanisë “Shperdhaza Energy” që ka marrë me koncesion ndërtimin e tre hidrocentraleve në Kaçinar.
Burimet thanë se për zbardhjen e ngjarjes do të merren në pyetje organizatorët e protestave të vazhdueshme kundër HEC-eve. Nga tërësia e veprimeve hetimore dhe kqyrja e kamerave të sigurisë rezulton se autoret të cilët lëviznin me një automjet tip "Benz" e kanë ndjekur 35-vjeçarin për disa kilometra derisa ka hyrë në parkingun e një restoranti në rrugën nacionale Lezhë-Milot. Ata janë konfliktuar më pas e kanë marrë forcërisht në makinën e tyre.
Autorët kanë ushtruar dhunë ndaj 35-vjeçarit Dod Gjoka, duke i shkaktuar fraktura të shumta në kokë dhe përballë ndjekjes nga policia pas dy orësh e kanë lënë të lirë në zonën e Rrasfikut në Mirditë. I plagosur ndodhet në spitalin e Lezhës jashtë rrezikut për jetën, ndërsa kërkimet për gjetjen e autorëve janë përqendruar në fshatrat e Mirditës.
Komente
