Kombëtarja U-17 i ka nisur me një test pozitiv përgatitjet për kualifikueset e Europianit 2023/2024. Kuqezinjtë e drejtuar nga Ardi Behari fituan 2-1 me përmbysje ndaj bashkmoshatarëve kosovarë në ‘Kukës Arena’.
“Pati një dëshirë të jashtëzakonshme të çunave, një këmbëngulje dhe ajo që më gëzon përtej fitores është fryma e grupit,”-u shpreh Ardi Behari, trajner i kombëtares U-17.
Ndërkohë te ‘dardanët’ kishte një arsye për këtë humbje.
“Ishin ndryshime të detyruuara pasi disa futbollistë ishin të lënduar dhe klubet na kanë mjaftuar se nuk janë në formën optimale. Mund të luanin 40-50 minuta,”-tha Arbnor Morina, trajner i Kosovës U-17.
Të dyja përfaqësueset do zhvillojnë një tjetër miqësore po në Kukës më 16 tetor në orën 11:00. Eliminatoret e Kombëtares U-17 nisin më 15 nëntor në transfertën e Portugalisë, ndërsa po në grupin 5 bëjnë pjesë edhe Çekia me Malin e Zi.
