"Vendi ku ndodhemi do të jetë vend-depozitimi i plehrave për të gjithë rrethin e Përmetit për këtë arsye banorët e fshatit Piskovë kanë protestuar, duke kërkuar anulimin e këtij projekti në këtë hapësirë të gjelbër që ndodhet në rrugën që të çon drejt Bredhit të Hotovës".
Banorët e fshatit Piskovë shprehen se Bashkia e Përmetit ka ndërmarrë një vendim arbitrar, të pa konsultuar për të shndërruar një fushë të gjelbëruar në një vendepozitim për mbetjet urbane.
“Kërkojnë të na sjellin plehrat e të tëra bashkive aty ku mbi ujin e pijshëm. Të kenë turp këta që po shtojnë veç varfërisë një mijë halle për këtë popull. Pse po i sjellin këtu, apo se është e vogël Piskova. Tatëpjetë ka helmime, kemi ujë, kemi të tëra. I sjellin në Piskovë, pikërisht se ka një terr informativ. Prandaj nuk e dimë."-thanë banorët.
Shqetësimi i banorëve përvec zhdukjes së gjelbërimit, ndotjes së ambientit dhe cënimit të zonës së mbrojtur, ka dhe anën tjetër negative. Atë të depërtimit të ujërave nëntokësorë në ujësjellësin e fshatit. Thirrjen për të anuluar këtë projekt nuk ia drejtojnë vetëm kryetares së bashkisë, Alma Hoxha, por dhe ministren së Turizmit e Mjedisit Mirela Kumbaro e cila është edhe deputete e zonës.
"I bëjmë thirrje ministres Mirela Kumbaro që është dhe e Turizmit dhe Mjedisit të marri masa për këto. Të hetojë SPAK dhe Yuri Kim që thotë për SPAK. Këtë t'ju thotë Yuri Kim atyre, pse i bëjnë fshehurazi. Ta denoncojnë kush ka dorë e të vihen para drejtësisë."- u shprehën banorët.
Kryeplaku i fshatit shprehet se protesta do të përshkallëzohet deri në bllokimin e aksit nacional.
"Para dy tri vitesh që ishte Park Kombëtar, sot nuk e nxjerrin që është Park Kombëtar. Vec asaj 1 km më poshtë kemi ujin e pijshëm. Jemi të varur nga uji i pijshëm nga Vjosa, nga kjo degë e lumit. Kemi kërkuar takim me kryetaren e bashkisë, nuk kemi pasur një reagim dhe me ç'duken gjërat, janë vendosur nga ana e minsistrisë dhe bashkisë."-tha kryeplaku i fshatit,
Vend-depozitimi i plehrave, sipas projektit të bashkisë do të stacionohet në këtë territor të gjelbëruar fare pranë rrugës që në çon në teqen Alipostivan, një vend ku shkojnë me mijëra pelegrinë.
Komente
Te dashur turiste vendas dhe te huaj qe doni te vizitoni Permetin e bukur te trendafilave,jeni te mirepritur te vizitoni cdo cep te tij,Benjen dhe ujerat e saj termale,Kanionin e Lengarices,Frasherin,Vjosen,teqete dhe kishat,etj,mos harroni dhe te fameshmin Bredhin e Hotoves,qe nuk bie me pak nga bukuria dhe madheshtia,se Alpet e Shqiperise,n.q.s e keni veshtire t'a gjeni,apo humbni rrugen te dalldisur nga bukuria e tij,mos e kerkoni ne GPS,mos lajmeroni policine,por shikoni rruges per nje pike rreferimi,qe sherben dhe si shenje mireseardhjeje,shikoni per fushen e plerave,nese nuk e shikoni nga pakujdesia,ju rekomandojme te ngrini lart ne ajer,drejt qiellit,hunden,si qente,sidomos ne ditet e nxehta,te cilat Permeti i ka me bollek,dhe keni per te ndiere nje ere te pagabueshme,te rende,qe do t'ju orientoje qe po i afroheni Bredhit,ose teqese,pra nuk jeni larg dhe nuk keni gabuar rruge;ajo nuk eshte ere trendafilash,pishash,bredhash,bari,apo lulesh te egra,ajo eshte era e pagabauar e plerave qe dekompozohen ne fushe.Gjithashtu iu rekomandojme qe ne vend te ujit te burimeve perreth zones,pini dhe lahuni me raki Permeti,ka per te qene e paster dhe shume me e sigurte,se ujrat burimore te aromatizuar e te pasuruar me substanca te dyshimta, qe natyra ka per t'i filtruar nga fusha e plerave qe do te behet aty prane!!!
Përgjigju