Kryeministri i Maqedonisë së Veriut, Christian Mickoski, ka shprehur habinë e tij për reagimin e Athinës zyrtare lidhur me komentet e tij mbi “çështjen e pazgjidhur maqedonase”.
Në një deklaratë zyrtare, Athina theksoi se "çështja e emrit të Maqedonisë së Veriut është zgjidhur përfundimisht dhe në mënyrë të pakthyeshme" me Marrëveshjen e Prespës. Ata e konsiderojnë përmendjen e "çështjes maqedonase të pazgjidhur" nga Mickoski si një provokim dhe rikthim të një çështjeje të zgjidhur. Greqia rikujton se përparimi në marrëdhëniet dypalëshe dhe integrimi evropian i Maqedonisë së Veriut kërkojnë respektimin e plotë të Marrëveshjes së Prespës dhe shmangien nga deklaratat irredentiste ndaj vendeve fqinje.
Në një intervistë për televizionin shtetëror të Maqedonisë së Veriut (MTV), Mickoski u ndal tek deklaratat e tij gjatë një takimi me mërgimtarët maqedonas në SHBA, duke theksuar se nuk përmendi emra specifikë dhe se reagimi i Athinës ishte i papritur.
Mickoski deklaroi më pas se nuk do të lejojë që kjo çështje të shndërrohet në një proces të pafund, duke e cilësuar si një çështje të hapur, veçanërisht në kontekstin e aspiratave të vendit për anëtarësim në Bashkimin Evropian.
Ai nënvizoi se do të ishte e papërgjegjshme të thuhej se “çështja maqedonase është e mbyllur”, përderisa vendi nuk është pjesë e BE-së dhe kur të drejtat e maqedonasve në vende të tjera, si në Bullgari, vazhdojnë të shkelen.
Gjithashtu, Mickoski kritikoi përdorimin e çështjeve dypalëshe si kriter për integrimin në BE dhe premtoi se do të luftojë për të drejtat e komunitetit maqedonas, duke i cilësuar këto si padrejtësi që nuk mund të neglizhohen në shekullin e 21-të.
"Sa të jem gjallë dhe aktiv në këtë punë, do të angazhohem për të korrigjuar këto padrejtësi," përfundoi ai.
Komente
