Partia e Lirisë thotë se largimet nga vendi janë pasojë e keqqeverisjes dhe se programi i saj do të ndalonte shpopullimin.
Në një deklaratë për mediat, sekretarja e Përgjithshme e Partisë së Lirisë, Brunilda Haxhiu tha se Shqipëria është vendi më i varfër në rajon, ndërsa familjet shqiptare përballen me vështirësi të mëdha ekonomike.
‘Shqipëria është vendi më i varfër në rajon, por paguan si të ishte i pasur. Qeveria ka dështuar në garantimin e cilësisë së jetesës së qytetarëve. Familjet shqiptare përballen me vështirësi të mëdha ekonomike. Shqiptarët kanë pagat dhe pensionet më të ulëta në rajon, por çmimet më të larta për mallrat e konsumit të përditshëm. Pjesa më e madhe e shpenzimeve mujore të qytetarëve shqiptarë shkon për ushqime, tregues tipik i vendeve në varfëri ekstreme. Sipas Eurostat dhe Instat, shqiptarët shpenzojnë vetëm për ushqime mbi 40% të të ardhurave mujore, përqindja më e lartë në të gjithë kontinentin. Ndërsa në vendet e Bashkimit Europian kjo mesatare është 13%.
Në Shqipëri fuqia blerëse është shumë e ulët, vetëm 34% e mesatares europiane. Në kushtet kur shqiptarët nuk arrijnë të përmbushin as nevojat më bazike të tyre, sigurisht që e vetmja alternativë për ta mbetet emigrimi. Është absurde që, edhe pas disa vitesh pune edhe karriere, përsëri familjarët të përpiqen për mbijetesën e tyre. Edhe pse Shqipëria është një vend bujqësor, ku prodhimi i saj përfaqëson 16% të PBB, mbetet e varur nga mallrat e importit.
Haxhiu deklaroi se mungesa e subvencioneve, ndarja e tokës në fragmente të vogla, përjashtimi nga skemat mbështetëse si dhe bllokimi i fondeve të IPARD nga BE, e kanë lënë fermerin në mëshirë të fatit.
Partia e Lirisë akuzon qeverinë se ka braktisur prodhimin vendas, duke nxitur varfërinë, importin dhe shpopullimin.
'Mungesa e subvencioneve, ndarja e tokës në fragmente të vogla, përjashtimi nga skemat mbështetëse, bllokimi i fondeve të IPARD nga BE, e kanë lënë fermerin në mëshirë të fatit. Në vend që shqiptarët të konsumojnë prodhime vendase, bio dhe me çmim të ulët, ata detyrohen të blejnë shtrenjtë mallrat e importit. Qeveria ka braktisur prodhimin vendas, sepse ka instaluar modelin ekonomik të oligopoleve, të importit dhe të përqendrimit të parave vetëm në një grusht njerëzish pranë saj.
Ky model ekonomik, i ndërtuar mbi varfëri, import dhe korrupsion, po nxit largimin masiv të shqiptarëve, veçanërisht të rinjve dhe familjeve të reja. Kostoja e jetesës është bërë një barrë e papërballueshme, ku qytetarët nuk përballojnë dot as shportën ushqimore. Tregu i lirë është pushtuar nga monopolet dhe importuesit e lidhur me pushtetin. Fshatrat dhe qytetet po boshatisen përditë, sepse të rinjtë nuk shohin as siguri, as të ardhme në Shqipëri. Partia e Lirisë e ka ndalimin e shpopullimit prioritetin e saj të parë, duke mbështetur familjet e reja me paga më të larta, programe strehimi, rimbursim të shpenzimeve për ushqimet bazë, kredi për blerje shtëpie me interes të subvencionuar, etj', tha ajo.
Komente
Oj zonje hajde mos shit peralla ja ku kalua 40 vjet mbas rezimit te komunizmit me trego cka keni ndertuar per popullin asgje sejcila parti qe qeverisi i mbushen xhepat ndertuen villa per veten kurse fshatrave akoma ju mungon uji i pijshem a nuk te vjen turp qe te flasish ju luftoni vetem per rogat e juaja te larta kurse populli ike per buken e gojes ,mos haroni vetem dicka se ligji i luftes eshte akoma ne fuqi mundet te ndodhe qe nji dite edhe ti dote detyrohesh te ikish per ta shpetuar koken ose dote behesh Gaduri i Grekve.
Përgjigju