Haxhi Lika, 77-vjeç, mbeti i plagosur gjatë aksionit të RENEA-s në fshatin Remas të Divjakës, pasi dyshohej se strehonte në banesë një të kërkuar për vrasje.
Burime për Report Tv bëjnë të ditur se SHÇBA ka nisur verifikimet për veprimet e policisë gjatë aksionit për arrestimin e Laert Haxhiut, i akuzuar si një prej autorëve të masakrës së Lushnjes sëbashku me Orgest Bilbilin, ku u ekzekutuan në mes të qytetit pasditen e 17 tetorit 2017 dy të rinjtë Zamir Latifi dhe Jurgen Hoxha. Haxhiu dyshohej se fshihej pikërisht në banesën e Haxhi Likës.
Nga ana e saj, Policia e Shtetit sqaroi ngjarjen duke theksuar se i moshuari nuk iu përgjigj thirrjes së efektivëve, ndërsa mbeti i lënduar në rrethana të paqarta, duke përfunduar me një plagë të rëndë në kokë. Ende nuk është e qartë nëse Laert Haxhiu strehohej vërtetë në shtëpinë e të moshuarit, por familjarët e të plagosurit mohojnë të kenë fshehur në banesë të shumëkërkuarin.
Gjithashtu ka dyshime se operacioni i policisë është dekonspiruar dhe mendohet se Laert Haxhiu është larguar nga fshati Remas disa orë përpara se aty të zbarkonte RENEA.
Komente
