Lezhë-Dy personat e arrestuar pas të shtënave me armë ku mbeti i plagosur një i ri gjatë aksionit të Policisë së Lezhës në qytetin e Laçit, u njohën me masën e sigurisë në Gjykatën e Lezhës (16 mars).
Në seancën gjyqësore të zhvilluar me dyert të mbyllura gjyqtari Aldi Kareco, e cilësoi të ligjshëm arrestimin e 28-vjeçarit Klaudio Buraku, duke caktuar masën e sigurisë "Arrest në Burg", ndërsa xhaxhai i tij Gjin Buraku i cili dyshohet se plagosi me armë zjarri 26-vjeçarin Mehmet Domi u la i lirë kundrejt garancisë pasurore si dhe u vendos ndalimi i daljes së tij jashtë territorit shqiptar.
Xhaxha e nip u arrestuan nga policia të mërkurën e 13 marsit, teksa blutë kishin marrë informacion se një shtetas i kërkuar po lëvizte me automjet, në lagjen nr. 4, Laç.
Në momentin e ndërhyrjes për ndalimin e këtij shtetasi, shërbimet e Policisë kanë dëgjuar të shtëna me armë zjarri, dhe menjëherë kanë ndërhyrë ku u vunë në ndjekje të automjetit që lëvizi me shpejtësi.
Gjatë ndjekjes, automjeti që drejtohej nga Klaudio Buraku, në tentativë për t'iu shmangur shërbimeve, është përplasur me automjetin e shërbimeve operacionale të policisë. Pas kësaj blutë e vendosën në pranga ndërsa nga kontrollet e kryera makinë gjetën dhe sekuestruan 3 armë zjarri (2 pistoleta dhe 1 kallashnikov) dhe municion luftarak.
I riu ishte shpallur në kërkim në vitin 2023, për armëmbajtje pa leje, kanosje dhe shkatërrim të pronës, ndërsa nga veprimet hetimore të kryera në vendngjarje, dyshohet se para se të ndërhynte Policia, për kapjen e të kërkuarit, në automjetin e tij ndodheshin dhe persona të tjerë.
Gjatë një konflikti për motive të dobëta, dyshohet se Gjin Buraku i afërm i Klaudio Buraku, ka plagosur në këmbë, me armë zjarri pistoletë, Mehmet Domin, 26 vjeç, i cili është jashtë rrezikut për jetën.
Komente
