TIRANE-Report Tv mëson tre emrat e kandidatëve që kanë kaluar fazën e parë për plotësimin e Gjykatës së Lartë. Tre kandidatët janë Ilir Panda, Sokol Sadushaj dhe Ervin Pupe.
Pas interesimit të Report Tv, në një përgjigje për gazetarin Arsen Rusta, Këshilli i Lartë Gjyqësor sqaron se për 4 pozicionet e lira për anëtarët jo magjistratë u paraqitën 23 kandidatë. Katër nga kandidatët u tërhoqën, ndërsa për 14, vijon më tej KLGJ-ja u vendos skualifikimi dhe përjashtimi nga gara.
Pas kalimit të fazës së parë nga tre kandidatët, ka filluar faza e dytë e vlerësimit, pikëzimit dhe renditjes. Këshilli i Lartë Gjyqësor thekson se dy kandidatë janë në proces verifikimi dhe për këtë institucioni do të shprehet në ditët në vijim.
Gjykata e Lartë duhet të ketë 19 anëtarë, ku 16 prej tyre duhet të jenë gjyqtarë karriere dhe 3 nga avokatia, shoqëria civile, pedagogë ose jurist i shquar me mbi 15 vjet punë. Të parët që do të zgjidhen për anëtarë të kësaj gjykate, do të jenë 3 anëtarët që vijnë nga jashtë sistemit të drejtësisë.
Aktualisht në Gjykatën e Lartë ushtron detyrën vetëm një gjyqtar pasi të tjerët u shkarkuan nga procesi i vetingut ose dhanë dorëheqjen. KLGJ komandoi pak kohë më parë gjyqtarë të gjykatave të Apelit për të mundësuar shqyrtimin e disa çështjeve emergjente, kryesisht mbi ekstradimet. Kështu pas Kushtetueses po shkon drejt ngritjes edhe Gjykata e Lartë.
Përgjigja e KLGJ-se per gazetarin e Report Tv, Arsen Rusta
Komente
