Plotësohet me të 24 skuadrat Euro 2020 që do të zhvillohet vitin e ardhshëm i shtyrë për shkak të pandemisë. 4 ekipet e fundit që prenë biletën ishin Maqedonia e Veriut, Hungaria, Sllovakia dhe Skocia që u kualifikuan nga play-off i Ligës së Kombeve. Maqedonia e Veriut bën historinë duke u kualifikuar për herë të parë në një kompeticion madhor. Goli i veteranit Goran Pandev mjaftoi për të mundur Gjeorgjinë 1-0. Meritë kanë edhe futbollistët shqiptarë që luajnë në kombëtaren e vendit fqinj.
Në një kompeticion madhor do të luajë për herë të parë që pas Botërorit të 98-tës edhe Skocia. Britanikët bënë surprizën duke mposhtur pas penalltive Serbinë në Beograd. 120 minutat u mbyllën në barazim 1-1 ndërsa nga pika e bardhë fatal rezultoi gabimi i Mitrovic.
Edhe Sllovakisë i janë dashur 120 minuta për të siguruar një biletë për në Europianin e ardhshëm. Sllovakët mposhtën 2-1 Irlandën e Veriut dhe do të luajnë në grup me Poloninë, Spanjën dhe Suedinë në Euro 2020.
Pas 2016-tës Hungaria do të marr pjesë sërish në Europian. Hungarezët përmbysën Islandën duke fituar 2-1 në frymën e fundit falë golit të talentit Dominik Szoboszlai në shtesë. Në Europian Hungaria do jetë në grupin e vdekjes me Francën , Gjermaninë e Portugalinë.
Përgatiti: Andi Kapxhiu
