Tiranë- Ka vijuar deri në orët e pasdites së të martës dëshmia e bashkëpunëtorit të drejtësisë, Nuredin Dumani, në seancën e radhës në GJKKO, në procesin e dosjes “Plumbi i art”.
Gjatë përgjigjeve të pyetjeve të avokatëve të të akuzuarve, Dumani ka debatuar ashpër edhe me ish-shokët e tij Gent Sharra dhe Asllan Plaku, të cilët i ka implikuar në ngjarje kriminale.
Dumani ka pretenduar se i kanë çuar fjalë njerëz në burg që të ndërronte dëshminë për Gent Sharrën dhe Suel Çelën, kundrejt qindra mijëra eurove.
Por kjo gjë ka irrituar si Asllan Plakun, ashtu edhe Gent Sharrën.
Në seancë, ky i fundit i tha Dumanit:
“Ky është një qenie e shpifur, sajon gjëra, përmend dhe emra, jo Emiliano Shullazi e ku di unë, që s’kanë lidhje me këtë çështje”, tha Sharra.
Ndërkohë Asllan Plaku deklaroi në seancë se ka qenë Nuredin Dumani ai që i ka vënë gjobë Gent Sharrës 200 mijë euro dhe Suel Çelës 500 mijë euro, për të ndryshuar dëshminë.
Dje (25 shkurt), Dumani dëshmoi për kodet e PIN-eve që i kishte dhënë SPAK-ut për platformat e enkriptuara të SKY ECC, Matric dhe BQ, që i përdorte për komunikim kriminal me krerët e organizatave.
Ai tha se kodet ishin 'Totorina", "Covid 19" dhe "Alcatraz", teksa dëshmoi për paktin e fshehtë me Erjon Alibej për të eliminuar të gjithë kundërshtarët në një listë të hartuar në 3 orë takim, mes tyre Talo Çela.
Enver Diva deklaroi në GJKKO se Dumani kishte takuar dy biznesmenë dhe dy deputetë në lokal, që i dhanë një çantë me lekë për të hequr qafe Talo Çelën. Dumani rrëfeu edhe miqësinë e kthyer në armiqësi me Talo Çelën dhe krimet e kryera, të cilit i vrau edhe të vëllanë, Bujar Çela, në Elbasan.
Komente
