Astronautët e NASA-s, Jasmin Moghbeli dhe Loral O'Hara, po kryenin një shëtitje të rrallë kozmike jashtë Stacionit Ndërkombëtar të Hapësirës (ISS) më 1 nëntor. Teksa po bënin disa riparime ata humbën çantën e tyre të veglave.
“Gjatë riparimit humbi një çantë me mjete. Çanta u pikas duke përdorur kamera të jashtme, por meqenëse u vlerësua se nuk përbën rrezik për stacionin, me shumë mundësi do të qëndrojë lundruese në hapësirë dhe do të rrotullohet rreth Tokës së bashku me stacionin”, thanë ata nga NASA.
Çanta e bardhë vezulluese tashmë është vënë re nga astronomët nga vende të ndryshme të Tokës, pasi mund të shihet edhe me dylbi. Astronauti japonez Satoshi Furukawa e pa çantën javën e kaluar teksa fluturonte mbi malin Fuji. Objekti do të qëndrojë në orbitën e Tokës për disa muaj dhe më pas do të digjet pas rihyrjes në atmosferë, raporton The Guardian.
Kjo nuk është hera e parë që një objekt humbet në hapësirë, pasi në vitin 2008, austronautja Heidemarie Stefanyshyn-Piper humbi çantën e saj të veglave, teksa po rregullonte një pjesë të dëmtuar në ISS. Humbja e asaj çante bëri që kontrollorët e misionit të ndryshonin planet për shëtitjet e mbetura në hapësirë të planifikuara gjatë misionit të anijes kozmike Endeavour.
