Thethi ishte vetëm pikënisja e një aksioni që do po zgjerohet në të gjithë vendin për shembjen e ndërtimeve pa leje, thotë kryeministri Edi Rama.
Shembull konkret sipas tij, është rasti i resortit pa leje “Sent Michele Rezidencë” në rrethin e Durrësit, ndërtuar totalisht pa leje në 5 mijë e 600 metra katrorë tokë gjatë vitit 2018, nga Ardian Halili, në atë kohë në krye të Inspektoratit për Mbrojtjen e Territorit në Durrës.
Teksa ka ndarë pamjet nga shpërthimi me tritol i resortit, Rama shprehet se dje u vendos rendi ligjor për një abuzues që kishte marrë peng territorin, dhe që tashmë i është dorëzuar drejtësisë.
“Ca zëra në nisje të kësaj kthese të re thoshin “po pse Thethi e jo Jugu, po pse ashtu e jo kështu”, ndërkohë puna për mbrojtjen e vendit nga abuzuesit vazhdon në Veri, Jug dhe Shqipërinë e Mesme, ku konkretisht në Durrës është vendosur rendi ligjor mbi një territor të marrë peng nga një abuzues, i cili është ndaluar nga Policia e Shtetit e i është dorëzuar drejtësisë edhe si ish-drejtues i inspektorëve të Durrësit”, ka shkruar kryeministri.
Rezidencat me fushë futbolli e pishinë të cilat u shembën me tritol, ndodheshin pranë bregut të detit ne zonën e Kepit të Rodonit, ku vetëm javët e fundit janë evidentuar 66 objekte të pa leje. Ish-zyrtari, bashkëshort i ish-prokurores Rabjana Halili, sot avokate, u la në burg nga Gjykata e Durrësit ndërsa do të hetohet nga SPAK për ndërtim pa leje, korrupsion të zyrtarëve dhe shpërdorim detyre.
Resorti pa leje dhe Ardian Halili
Gjykata e Durrësit ka caktuar masën e sigurisë “arrest me burg” për ish-kryeinspektorin e Inspektoriatit të Mbrojtjes së Territorit (IMT) në Durrës, Ardian Halili, i cili ndërtoi pa leje resortin 5600 m2 te Kepi i Rodonit.
Vendimi u mor nga gjyqtari i çështjes Paulum Çera, i cili e konsideroi të vlefshëm izolimin e Halilit. Ardian Halili u arrestua tre ditë më parë më 27 gusht i akuzuar për veprat penale "Ndërtim i paligjshëm me qëllim përfitimi", "Korrupsion i zyrtarëve të lartë" dhe "Shpërdorim i detyrës", ndërsa do të hetohet nga SPAK.
Në kohën kur Halili drejtonte inspetorët e IMT-së në Durrës, gjatë periudhës 2018-2021, ai ndërtoi pa leje në zonën e Ishmit pranë Kepit të Rodonit në resort të pozicionuar në një sipërfaqe prej 5.600 metra katrorë.
Resorti “Saint Michelle Residence” konsiston në ndërtimin e 11 godinave tip gazoniere, një ndërtese 2 katëshe dhe një mini fushe futbolli, i gjithi pa leje të posaçme ndërtimi. “Saint Michelle Residence” u shemb ditën e djeshme me anë të shpërthimit të komanduar.
Komente
Vete i ndertojne, vete i prishin, qe t’i ndertojne prape, ky eshte misioni i operacionit special Rama 3
Përgjigju