4 persona janë arrestuar pasi akuzohen për prodhim dhe trafikim të lëndëve narkotike. Ata kishin mbjellë kanabis në zonat malorë të Dukagjinit dhe më pas e trafikonin atë në Shkodër, ku dhe u arrestuan teksa po transportonin mbi 96 kg kanabis.
4 trafikantët kishin disa muaj në hetim dhe vëzhgimi nga policia dhe u arrestuan gjatë operacionit të koduar “Bzheta”. 4 personat ishin drejtuar me 3 mjetet e tyre drejt Shkodrës, ku u ndaluan edhe nga policia. Tre automjete që drejtoheshin nga shtetasit Besnik Bludaj, Prel Zefi dhe Pllum Fusha, ndërsa pasagjer ishte Albert Logu
Gjatë kontrollit në brendësi të automjetit tip furgon të Prel Zefit u gjetën 96 kilogramë e 500 gramë kanabis
Kjo bëri që 4 personat të arrestohen në flagrancë. Në pranga ranë Prel Zefi, 30 vjeç, Albert Logu, 21 vjeç, të dy banues në Shtoj i Ri, Pllum Fusha, 37 vjeç, banues në Grudë e Re dhe Besnik Bludaj, 40 vjeç, banues në Vrak, Malësi e Madhe.
Në cilësinë e provës materiale u sekuestruan lënda narkotike, 8 aparate celular dhe 3 automjete.
Materialet procedurale i kaluan për ndjekje të mëtejshme, Prokurorisë pranë Gjykatës së Shkallës së Parë Shkodër, për veprat penale “Prodhimi dhe shitja e narkotikëve” dhe “Pastrimi i produkteve të veprës penale ose veprimtarisë kriminale”.
