17 vjeçari polak Maciej Domagala është fituesi i çmimit të edicionit të parë të Konkursit Ndërkombëtar “J’adore Chopin” (Unë e adhuroj Shopenin), i cili ka ulur siparin mbrëmjen e së enjtes në skenën e Teatrit Kombëtar të Operas dhe Baletit.
Një natë finale plot surpriza, me pejsëmarrjen e qindra pianistëve të rinj nga Shqipëria dhe e gjithë bota.
“Juria ka mbetur në përgjithësi e kënaqur. Mendoj që shërben për të kuptuar më mirë shpirtin e interpretimit të një muzike që është evropiane, që është botërore, që festohet në të gjithë botën. Të merresh me një nivel të lartë të muzikës, sigurisht që u bën mirë të gjithëve: ky ballafaqim, këto vlerësime, që bën një juri, ku shumica e tyre vijnë për herë të parë në Shqipëri dhe shikojnë nivelin e shkollës sonë. Mendoj që edicionet e saj shërbejnë për të rritur nivelin më tepër dhe për të qenë më dinjitozë me talentet tona, që nuk i mungojnë Shqipërisë.”, - thotë Zhani Ciko, ideator dhe drejtues i “J’adore Chopin”
Mes çmimeve të ndara vlen të përmendim edhe çmimin e dytë dhe atë të tretë, përkatësisht Ilaria Picci dhe Giulia Loperfido, që vijnë nga Italia. Ndër pjesëmarrësit më të vegjël në moshë në këtë konkurs ishte ajo e 8-vjeçarit japonez, Ei Fujimori, i cili u vlerësua me çmimin e parë të Kategorisë së Parë.
“Kam tre vjet që luaj në piano. Kompozitori që pëlqej më tepër është Mozart. Luaj dy deri në katër orë çdo ditë në piano. Studioj në shkollë në Gjermani, në Dusseldorf.”, - thotë Fujimori.
Vlerësimi i pianistëve të rinj është bërë nga një juri ndërkombëtare me profesionistë të muzikës nga Gjermania, Franca, Italia dhe Polonia. Konkursi “J’adore Chopin” (Unë e adhuroj Shopenin) është mbajtur nga 1 deri më 6 mars me rastin e 215-vjetorit të lindjes së Frederik Shopen dhe 30-vjetorit të Shoqatës që mban emrin e tij.
Komente
