Një ish-oficer i Patrullës së Përgjithshme në Seksionin e Rendit, Komisariati i Policisë Lezhë, është kapur me pamje filmike nën dyshimin se po konsumonte lëndë narkotike.
Pas videos së publikuar nga JOQ në faqen e saj, Policia e Shtetit dhe e Lezhës kanë reaguar, duke deklaruar se ish-efektivi Xhovano Tuci është përjashtuar nga detyra prej një muaji për shkelje të rënda në punë (para videos dhe rastit në fjalë), masë e cila është ende në fuqi nga Komisioni i Apelit dhe Standardet Profesionale, për shkak të shkeljeve të shumta të sjelljes në punë.
Përjashtimi i tij sipas reagimit zyrtar, ishte kryer prej datës 3 korrik, ndërsa mbante edhe gradën e Inspektorit. Ai ka munguar për një javë pa arsye në punë. Vendimin e ka ankimuar, por edhe në datën 25 korrik Komisioni i Apelimit në Drejtorinë e Përgjithshme të Policisë së Shtetit ia ka lënë në fuqi masën e përjashtimit. Tuci më herët kishte edhe masën disiplinore të shtyrjes së gradës.
Aktualisht policia sqaron se ndaj ish-efektivit po kryhen edhe hetime shtesë për rastin e videos ku dyshohet se konsumon lëndë narkotike, por që duhet konfirmuar nëpërmjet ekspertimit dhe dëshmive.
Reagimi i plotë i Drejtorisë Vendore të Policisë Lezhë:
"Në lidhje me një video të publikuar në rrjete sociale, më datë 28.07.2025, në të cilën shfaqet një punonjës policie, i cili nga pamjet dyshohet duke konsumuar lëndë narkotike, dhe me pretendimin se Drejtoria Vendore e Policisë Lezhë nuk ka reaguar, sqarojmë opinionin publik se:
Shtetasi i shfaqur në video është përjashtuar nga radhët e Policisë së Shtetit.
Gjithashtu, sqarojmë se punonjësi i Policisë Xh. T., para dhënies së masës "Përjashtim nga Policia", ka qenë në efektin e masës disiplinore "Shtyrje e afatit të gradimit për 3 muaj", dhënë me vendim nr. 29, datë 24.04.2025, për mosmbajtje të rregullt të uniformës së Policisë dhe sjellje jokorrekte ndaj eprorëve.
Po ashtu, Drejtoria e Standardeve Profesionale ka pasur në proces shqyrtimi/verifikimi dhe hetimi disiplinor punonjësin e Policisë, Inspektor Xh. T., me detyrë Oficer i Patrullës së Përgjithshme në Seksionin e Rendit, Komisariati i Policisë Lezhë, në Drejtorinë Vendore të Policisë Lezhë, për shkelje disiplinore të parashikuar nga neni 121 “Llojet e shkeljeve disiplinore”, pika 1, gërma “j”, “Braktisja e detyrës dhe mungesa e pajustifikuar dhe e vijueshme për një periudhë prej 7 ditësh pune ose më shumë”, dhe me vendim nr. 127, datë 03.07.2025, të Komisionit Disiplinor në Drejtorinë e Standardeve Profesionale, i është dhënë masa disiplinore “Përjashtim nga Policia”, parashikuar nga neni 123, gërma “e”, të ligjit nr. 82/2024 “Për Policinë e Shtetit”.
Bazuar në ligjin “Për Policinë e Shtetit”, punonjësi i Policisë gëzonte të drejtën për ta ankimuar vendimin në Komisionin e Apelimit në Drejtorinë e Përgjithshme të Policisë së Shtetit, i cili më datë 25.07.2025, ka lënë në fuqi masën “Përjashtim nga Policia” për punonjësin e Policisë Inspektor Xh. T., të marrë me vendim nr. 127, datë 03.07.2025, nga Drejtoria e Standardeve Profesionale në Drejtorinë e Përgjithshme të Policisë së Shtetit.
Pas publikimit të videos ku shfaqet punonjësi i Policisë Xh. T., i cili dyshohet se konsumon lëndë narkotike kokainë, nga ana e strukturave përgjegjëse të AMP-së dhe të Policisë së Shtetit, po kryhen verifikime të tjera, në funksion të të cilave do të referohen materialet në Prokurori, për ndjekje të mëtejshme procedurale.
Policia e Shtetit është e vendosur të largojë nga radhët e saj çdo punonjës policie që nuk përmbush detyrën, abuzon me atributet e punonjësit të Policisë së Shtetit dhe cenon imazhin e Policisë dhe besimin e qytetarëve te Policia e Shtetit".
Komente
Policia Shtetit ka plot drogagjij,pijanec,dhe bashkpuntorë me bandat! Pse vetingu në polici dështoj? Janë shum Polic me vila,biznese,gjobagjij që janë pasuruar me 50000 mij leka rrogë.
Përgjigju