"Elon Musk do të rikthehet së shpejti për t'u marrë me bizneset e tij, ndoshta që në javët e ardhshme".
Këtë e ka thënë Donald Trump për njerëzit e rrethit të tij të ngushtë, përfshirë disa anëtarë të kabinetit të tij. Miliarderi, këshilltar i ngushtë i presidentit të Shteteve të Bashkuara, i pranishëm kudo në eventet e tij dhe tashmë nga shumëkush i konsideruar si një "ekzekutues" i institucioneve falë shkurtimeve të buxhetit të realizuara përmes machete-s së departamentit të sapokrijuar Doge, Departamenti i Efiçencës Qeveritare, mund të largohet shpejt nga skena. Ndoshta, duke mbetur thjesht në rolin e një mbështetësi të jashtëm.
Kështu shkruan Politico, zakonisht i mirinformuar, duke cituar tre burime pranë Shtëpisë së Bardhë. Por përgënjeshtrimi nuk vonoi.
"Ky lajm është mbeturinë", ka deklaruar zëdhënësja Karoline Leavitt në X. "Elon Musk dhe presidenti Trump kanë deklaruar publikisht se Elon do të largohet nga shërbimi publik si punonjës qeveritar special sapo të përfundojë puna e tij e jashtëzakonshme në Doge", ka shtuar ajo.
Sigurisht, presidenti është i kënaqur me rolin që ka pasur sipërmarrësi nga Afrika e Jugut. Dhe largimi duket të jetë i qetë dhe i dakordësuar. Pra, Trump nuk po e shkarkon. Por, nëse konfirmohet, dalja nga skena vjen në një moment tensioni të lartë brenda kampit republikan, ku shumë mendojnë se njeriu më i pasur në botë, i cili mori një post qeveritar pa qenë kurrë i zgjedhur apo me përvojë politike, ka shkuar shumë larg. Për të thënë troç, është kthyer në një barrë.
Ai është bërë objekt protestash përpara koncesionarëve të makinave Tesla, e cila është shndërruar në simbolin e një pasurie të grumbulluar edhe falë fondeve publike në formën e subvencioneve shtetërore. Tashmë, ai nuk është i pëlqyer as nga elektorati republikan, i cili nuk ia ka falur, për shembull, shkurtimet në Departamentin e Çështjeve të Veteranëve, që mbështet ushtarakët në pension. Për shumëkënd, ky zemërim u materializua në humbjen e tij në Wisconsin të martën mbrëma: aty ku pronari i SpaceX dhe Tesla-s kishte investuar mbi 20 milionë dollarë në një garë për një vend në Gjykatën e Lartë të shtetit, duke e bërë atë zgjedhjen më të shtrenjtë të këtij lloji në histori.
Mbështetja e tij në një tubim elektoral për kandidatin konservator Brad Schimel, ku dhuroi dy çeqe nga një milion dollarë për pjesëmarrësit dhe tha se në lojë ishte "përparimi i njerëzimit", nuk shërbeu për asgjë. Elektorati që kishte votuar për Trumpin në nëntor, e ndëshkoi atë duke zgjedhur gjyqtaren liberale Susan Crawford, e cila mbështet të drejtën për abort dhe fitoi me më shumë se 10 pikë diferencë.
Sigurisht, dinamika e marrëdhënies Trump-Musk duket se ka ndryshuar krahasuar me një muaj më parë, kur Trump thoshte për mikun e tij: "Ai është këtu për të qëndruar". Por duhet pasur kujdes: më pak dukshmëri nuk do të thotë largim nga skena.
Një nga burimet e Politico thotë se "Musk me shumë gjasë do të mbajë një rol informal si këshilltar". Një tjetër paralajmëron: "Kushdo që mendon se miliarderi do të zhduket plotësisht nga orbita e Trumpit, gabon". Më shumë se një "përjashtim", kjo lëvizje është në përputhje me kontratën: largimi i tij përkon me përfundimin e periudhës si punonjës qeveritar special, një status i krijuar posaçërisht për të, i cili e përjashtonte përkohësisht nga disa rregulla etike dhe konflikti interesi. Kufiri për këtë status ishte vendosur në 130 ditë.
Një gjë është e sigurt: zërat e Politico-s po i bëjnë mirë aksioneve të Tesla-s, të cilat janë rritur me 3.7%, duke arritur në 278 dollarë, pas një fillimi në rënie të thellë për shkak të të dhënave mbi rënien e fortë të shitjeve në tremujorin e parë./ La Repubblica
Komente
