Portugali-Holandë është finalja e Ligës së Kombeve. Tulipanët kanë siguruar finalen mbrëmjen e djeshme duke mposhtur 3-1 pas kohëve shtesë Anglinë në një gjysmëfinale që dhuroi spektakël dhe emocione. Në minutën e 32-të Marcus Rashford transformoi në gol një penallti të fituar po vetë dhe të shkaktuar nga De Ligt.
Qendërmbrojtësi holandez shlyen gabimin e bërë në minutën e 73-të pasi barazon me kokë nga një goditje këndi. Më pas deri në minutën e 90-të ndodh gjithçka me raste, gol të anuluar me VAR dhe një traverse të Sterling. Në kohët shtesë “tre luanët” e falin ndeshjen pasi dy gabime të lojtarëve anglez shfrytëzohen nga Holanda që siguron finalen.
Në të 97-tën u shënua goli i dytë për Holandën pasi Walker e dërgoi topin në portën e tij dhe Promes mbylli llogaritë në minutën e 114-të sërish pas një gabimi të anglezëve. Anglia do luajë me Zvicrën në finalen e vogël të dielën në orën 15:00 ndërsa finalja e madhe e Ligës së Kombeve do luhet në Porto të dielën në orën 20:45 mes Portugalisë e Holandës./ Përgatiti Andi Kapxhiu
Komente
