TIRANË- Në faqen e Facebook-ut të Kuvendit të Shqipërisë u publikua një foto, ku bëhej thirrje për të votuar numrin 5 që mban PS në fletën e votimit në zgjedhjet parlamentare të 11 majit. Fotoja e publikuar në rrjetin social të Kuvendit u fshi menjëherë.
Në një reagim publik, Kuvendi thotë se administrata dhe shërbimet, faqja dhe rrjetet sociale të Kuvendit nuk janë përfshirë dhe nuk do të përfshihen në fushatë, edhe pse nuk sqarojnë se çfarë ka ndodhur me postimin që u publikua në faqe.
“Kuvendi i Shqipërisë është një institucion demokratik pluralist gjithëpërfshirës, përfaqësues i vullnetit të popullit dhe i të gjitha forcave politike.
Sqarojmë opinionin publik se shërbimet e Kuvendit, gjatë ushtrimit të detyrave të tyre, bazohen në parimet e profesionalizmit dhe paanshmërisë.
Kuvendi i Shqipërisë garanton opinionin publik se administrata dhe shërbimet, faqja dhe rrjetet sociale të tij nuk janë përfshirë dhe nuk do të përfshihen në asnjë mënyrë dhe në asnjë formë në fushatën e zgjedhjeve parlamentare”, thuhet në reagim.
Ky incident nuk i ka shpëtuar opozitës, ku deputeti Enkelejd Alibeaj ka bërë një postim në Facebook dhe shkruan se ka denoncuar rastin në KQZ, duke e cilësuar shkelje zgjedhore.
“Sapo bëra denoncim në faqjen zyrtare të KQZ për shkeljen ligjore të Kuvendit të Shqipërisë! Pres që KQZ, si edhe unë apo shumë të tjerë, ta kenë dokumentuar shkeljen ligjore, dhe të ndërmarrë procesin ndëshkimor dhe referimin penal në SPAK ose në Prokurorinë e zakonshme”, shkruan Alibeaj.
Fotoja e publikuar për pak minuta në faqen e Kuvendit
Komente
