Tirane- Në kuvendin e Shqipërisë pritet të votohet nesëe buxheti nen për nen i vitit 2025, pasi ka kaluar shqyrtimin dhe diskutimet në të gjitha komisionet parlamentare.
Në seancën që konsiderohet ndër më të rëndësishmet e aktivitetit parlamentar, rikthehet pas gati 1 viti mungese për shkak të arrestit shtëpiak, Sali Berisha, i cili buxhetin prej 8.2 mld eurosh e ka konsideruar si draftin e vjedhjeve të mëdha.
Tashmë në liri, Sali Berisha, teksa një ditë para njoftoi edhe 2 amendamente në buxhet me firmën e tij paralajmëron rikthim të fuqishëm në parlament
"Ju jeni dëshmitarë se si dritarja zëvendësoi parlamentin dhe Edi Rama në fjalimet e tij shprehte vrerin e papërmbajtur ndaj dritares. Kështu që unë kthehem nesër në parlament në vazhdim të betejës sime gjer në fitore. Kjo është!"
Rikthimi i Sali Berishës u shënjua me depozitimin e 34 amendamenteve të PD-së për buxhetin e vitit të ardhshëm, mes të cilave 2 mbajnë firmën e tij.
Por Burime për Report tv, bëjnë me dije se mazhoranca pritet të refuzojë amendamentet e demokratëve dhe të ngrejë në seancë plenare kartonët e kuq.
Gjatë mbledhjes së grupit amendamentet e Partisë Demokratike janë konsideruar provokim politik nga socialistët, çka priret të reflektohet edhe në qëndrimin e tyre në seancë.
E teksa dinamika në parlament pritet të ndryshojë me rikthimin e Sali Berishës, në rast të ndonjë skenari kaotik, dhe moslejimi nga opozita të një seancë normale, do të kalohet direkt në votim.
