Presidenti i Rusisë Vladimir Putin ka shprehur gatishmërinë të takojë Presidentin ukrainas Volodymyr Zelensky në Moskë.
Lideri i Rusisë është i gatshëm ta takojë Zelenskyn vetëm nëse ky i fundit pranon të udhëtojë drejt Moskës për një takim dypalësh.
Pas deklaratës së Putin Kievi reagoi menjëherë duke thënë se kjo është e papranueshme.
Nga Pekini Putin tha se kishte vënë re “një dritë të caktuar në fund të tunelit”, duke pasur parasysh ato që ai i quajti përpjekje të sinqerta nga Shtetet e Bashkuara për të gjetur një zgjidhje për luftën më të madhe tokësore të Evropës që nga Lufta e Dytë Botërore.
"Më duket se nëse mbizotëron arsyeja e shëndoshë, do të jetë e mundur të biem dakord për një zgjidhje të pranueshme për t'i dhënë fund këtij konflikti. Ky është supozimi im. Sidomos pasi mund të shohim humorin e administratës aktuale amerikane nën Presidentin Trump, dhe nuk shohim vetëm deklaratat e tyre, por edhe dëshirën e tyre të sinqertë për të gjetur këtë zgjidhje. Dhe mendoj se ka një dritë të caktuar në fund të tunelit. Le të shohim se si do të zhvillohet situata. Nëse jo, atëherë do të na duhet t'i zgjidhim të gjitha detyrat që kemi përpara me forcën e armëve", tha Putin.
“Bota sot ndodhet sërish përballë një zgjedhjeje: paqe apo luftë, dialog apo përplasje”, deklaroi presidenti kinez Xi Jinping gjatë hapjes së paradës ushtarake në Pekin, me rastin e 80-vjetorit të fitores në Luftën e Dytë Botërore.
Në paradë ishin të pranishëm edhe Presidenti rus Vladimir Putin dhe lideri i Koresë së Veriut, Kim Jong-un.
Ndërkohë, udhëheqësit e shteteve nordike dhe baltike do të takohen sot me Presidentin ukrainas Volodymyr Zelensky në Kopenhagen.
Sipas zyrës së Kryeministres daneze, Mette Frederiksen, do të diskutohet për mbështetjen e mëtejshme për Ukrainën.
"Sulmet ruse janë sulme demonstrative. Putin demonstron pandëshkueshmërinë e tij. Vetëm për shkak të mungesës së presionit të mjaftueshëm, kryesisht mbi ekonominë e luftës së Rusisë, ky agresion vazhdon", shkroi Presidenti ukrainas Volodymyr Zelensky në Telegram para takimeve.
Përfaqësuesja e Lartë e Bashkimit Europian, Kaja Kallas, ka reaguar për samitin në Kinë, ku u mblodhën Presidenti kinez, ai i Rusisë, Iranit dhe i Koresë së Veriut, duke i konsideruar si “autokratë të Pekinit”.
Kallas thotë se lufta e Rusisë në Ukrainë ka mbështetjen kineze.
“Teksa udhëheqësit perëndimorë mblidhen për diplomaci, një aleancë autokratike kërkon një rrugë të shpejtë drejt një rendi të ri botëror. Duke parë Presidentin Xi Jinping sot në Pekin së bashku me udhëheqësit e Rusisë, Iranit dhe Koresë së Veriut, ky nuk është vetëm një qëndrim anti-perëndimor, është një sfidë e drejtpërdrejtë ndaj sistemit ndërkombëtar të bazuar në rregulla. Dhe nuk është vetëm simbolik. Lufta e Rusisë në Ukrainë ka mbështetjen kineze. Këto janë realitete që Evropa duhet t'i adresojë", tha Përfaqësuesja e Lartë e BE-së, Kaja Kallas.
Foto: Volodymyr Zelensky
Presidenti ukrainas Volodymyr Zelensky mbërriti në Paris këtë mbrëmje për një takim me Presidentin francez Emmanuel Macron, raportoi Ukrinform.
Nga Pallati Élysée lideri ukrainas tha se Rusia nuk ka dhënë ndonjë shenjë paqeje.
"Nuk kemi asnjë sinjal nga Rusia në lidhje me një paqe të mundshme. Kam besim të madh në këtë koalicion të të vullnetshmëve; ju keni arritur të bashkoni shumë vende”, nënvizoi Zelensky.
Ndërkohë presidenti francez theksoi se: ‘Ne jemi të gatshëm të ofrojmë këto garanci sigurie, Europa është gati’.
Presidenti amerikan Donald Trump i lëshoi një paralajmërim të ri Presidentit rus Vladimir Putin, duke deklaruar se Uashingtoni është gati të reagojë nëse vendimet e Kremlinit në lidhje me luftën në Ukrainë nuk përputhen me pritjet amerikane.
"Nuk kam asnjë mesazh për Presidentin Putin, ai e di qëndrimin tim. Ai do të marrë një vendim, në një mënyrë ose në një tjetër. Çfarëdo që të vendosë, ne mund të jemi të lumtur ose të pakënaqur, dhe nëse jemi të pakënaqur, do të shihni se do të ndodhin gjëra", tha Trump nga Zyra Ovale së bashku me homologun e tij polak Karol Nawrocki.
Donald Trump bëri të ditur gjithashtu se do të flasë me Vladimir Putinin "brenda ditëve të ardhshme". "Nuk jam i lumtur", përsëriti presidenti amerikan, duke theksuar se lufta në Ukrainë "duhet të zgjidhet në një mënyrë ose në një tjetër".
Donald Trump e quajti konfliktin midis Rusisë dhe Ukrainës një "luftë budallaqe" dhe "më të keqen" që nga fundi i Luftës së Dytë Botërore, duke pasur parasysh "sa njerëz po humbasin jetën çdo javë".
"Mendova se Ukraina dhe Rusia kishin një marrëdhënie shumë të mirë. Mendova se do të ishte shumë më e lehtë. Nuk i dihet kurrë me luftërat”, shtoi ai.
Foto: Vladimir Putin dhe Volodymyr Zelensky
Propozimi i Presidentit rus Vladimir Putin për t'u takuar me Presidentin ukrainas Volodymyr Zelensky në Moskë është i papranueshëm, deklaroi qeveria në Kiev.
Ministri i Jashtëm Andrii Sybiha tha se të paktën shtatë vende, përfshirë Austrinë, Vatikanin, Zvicrën dhe tre shtete të Gjirit, janë gati të presin takimin.
"Këto janë propozime serioze dhe Presidenti Zelensky është gati për një takim të tillë në çdo kohë", deklaroi ai në X.
"Megjithatë, Putin vazhdon t'i mashtrojë të gjithë duke bërë propozime qëllimisht të papranueshme."
Komente
Trump paralaajmeron Putin ? Hahah ah hahah dhe kete nuk po e ze gjumi nga frika
Përgjigju