Ylli Gurra, myftiu i Tiranës, shprehet se ky muaji Ramazani ka qenë një muaj i pazakontë. Në një intervistë për Report TV ai e deklaroi këtë duke iu referuar periudhës së pandemisë së COVID-19. Sipas Gurrës besimtarët myslimanë në Shqipëri, përjashto ato që janë në zonat e kuqe, duhet ta falin Bajramin në sheshe, sigurisht duke respektuar masat e sigurisë. Gurra ndër të tjera thotë se frika nuk duhet të na mposhtë dhe se kjo festë kombëtare le të jetë një shpresë e madhe.
"Ka qenë një muaj i pazakontë, një Ramazan i pazakontë. Në aspektin hyjnor asgjë nuk ka ndryshuar, por në aspektin njerëzor ka qenë i trishtë. Ka në vetvete një lloj zymtësie, për pamundësinë për ta shprehur të gjithë domethënien e festave në mënyrën më qytetare dhe më madhështorë, që ka qenë tradicionale dhe e përvitshme.
Deri në këto momente Bajrami në zonat e kuqe do të falet në Xhami. Kryeministri ka thënë se nga nesër brenda parametrave, në zonat e kuqe, Bajrami të falet në Xhami. Do ishte mirë që Bajrami në zonat e gjelbra të falej në hapësirat publike siç është falur çdo vit. Sigurisht duke respektuar me rigorozitet masat e higjienës. Ceremoniali i Bajramit nuk zgjat më shumë se 30 minuta.
Për fatin e mirë koronavirusi Shqipërinë e kurseu nga një goditje fatale falë marrjes së masave në kohë. Mbi 40 bashki janë zonë e gjelbër çka do të thotë se nuk kanë problematika të theksuara. Ajo që dua të them është se nuk ka një frikë për të mbyllur portat e Xhamive. Për disa mund të jetë Bajrami i fundit. Jemi në përmbyllje të kësaj pandemie dhe 20 minuta ceremonial ndoshta s'do ishte i rrezikshëm gjithmonë duke marrë masat.
Për fatin e mirë Bajrami është për të gjithë shqiptarët. Do të jetë një festë kombëtare dhe nuk duhet të mbytemi në një frikë të paqenë.
Pastërtia për myslimanët është gjysma e besimit. Një mysliman nuk mund ti drejtohet asnjë objekti kulti pa higjienë vetjake, pastërtinë. Kjo është në librin e shenjtë. Sikundër çdo herë por edhe tani besimtarët do të jenë dyfish më të kujdesshëm në raport me frekuentimin e xhamive. Pastërtia e para, por jo nën ombrellën e një frike. Jemi bijtë të Zotit dhe do të marrim një vdekje si çdo kush, por duhet te frekuentojmë kultet,"-u shpreh Ylli Gurra.
Në fund myftiu i Tiranës falënderoi gazetarët për punën në këto kohë pandemie, ndërsa kishte edhe një mesazh për të gjithë besimtarët myslimanë: "Bajrami të jetë për një shpresë më të madhe dhe një ditë më të mirë. Shpresa te Zoti dhe te Drejtësia, qoftë me Zotin, qoftë me njëri-tjetrin. Gëzuar bajramin e Madhe dhe qoftë dita e një shprese të madhe."
Komente
Mos i lejoni të grubullohen e të shkaktojnë ndoj fatkeqësi virusi aman
Përgjigju