Skuderia Ferrari ka prezantuar makinën e sezonit të ri në Formula 1. Në Maranello ka dominuar ngjyra e kuqe, me italianët që e lanë prezantimin në 14 shkurt, ditën e të dashuruarve. SF-23 është makina që do konkurrojë në vitin e ri të Formula 1, me Ferrarin që do kërkojë garë në trofeun e pilotëve dhe në garën ekipore. Me dyshen Charles Leclerc dhe Carlos Sainz, objektivi është i qartë për të rikthyer "Kokëkuqen" në majën e botës.
Në lidhje me modelin e ri dhe sezonin që nis në mars, ka folur edhe Frederic Vasseur që është drejtuesi i ri i italianëve.
"Nuk më intereson nëse fiton Leclerc apo Sainz, rëndësi ka vetëm Ferrari. Ndiej përgjegjësi të madhe për të drejtuar këtë skuadër. Është shumë emocionuese të prezantosh Ferrarin e ri, pak a shumë si në ditën e parë të shkollës. Sezoni është i gjatë, por ne jemi të motivuar. Kemi punuar për të rregulluar pikat e dobëta dhe besoj se jemi gati për të luftuar", tha Frederic Vasseur.
Sezoni i ri në Formula 1 starton më 3 mars me Çmimin e Madh të Bahreinit, ndërsa testet para sezonale do të zhvillohen tre ditë radhazi prej datës 25 shkurt.
Komente
