Këtë të hënë, Festime Mjeshtri u prezantua nga PS si kandidate për kryetare Bashkie në Bulqizë për zgjedhjet e 14 majit. Mjeshtri do të zëvendësojë Lefter Allën, ish-kryebashkiakun që përfundoi në pranga pas abuzimeve me tenderat.
Burime për Report Tv bëjnë me dije se mbështetësit e ish-kryebashkiakut nuk u lejuan brenda me pretendimin se ishte mbledhje asambleje.
Lefter Alla është shkarkuar nga detyra nga kryeministri Edi Rama, për shkelje të rënda, pas arrestimit nga SPAK për abuzimet me tenderat publike, duke favorizuar kompanitë e të afërmve të tij.
Bashkë me 12 persona të tjerë, 7 prej tyre zyrtarë të bashkisë, ranë në pranga për abuzim me një tender me vlerë rreth 3 milionë euro. Në pranga ka rënë edhe nënkryetarja e Bashkisë, Enkeleda Lleshi. Arrestimi i tyre është bërë pasi akuzohen se kanë favorizuar të afërmin e Lefter Allës, Aqif Koneshën, i cili ka kryer punimet e ujësjellësit të ri. Më 18 mars, GJKKO caktoi masën e sigurisë ‘arrest me burg’ për kryebashkiakun e Bulqizës, dhe zyrtarët e tjerë të arrestuar. Gjatë dëshmisë së tij, Alla i konsideroi akuzat si sulme politike ndaj tij.
