Komisioni Qendror i Zgjedhjeve do të diskutojë ditën e nesërme lidhur me numrin e fletëve të votimit që do të prodhohen për çdo qendër votimi për zgjedhjet e 25 Prillit.
Sipas projektvendimit të KQZ-së, në rang kombëtar janë 5 199 qendra votimi. Në total janë 3 588 869, qytetarë me të drejtë vote, ndërsa do të prodhohen mbi 3 milionë e 660 mijë fletë votimi.
Gjatë mbledhjes së nesërme KQZ do hedhë dhe shortin për caktimin e anëtarit të tretë dhe të katërt të grupeve të numërimit të votave.
Kujtojmë se ende nuk është vendosur se cila do të jetë fleta e votimit për zgjedhjet e 25 prillit, pasi ky proces po mbahet peng për shkak të ankimimit të PS-së, për listat e koalicionit PD-AN në zgjedhjet e25 prillit.
Pas ankesës së KQZ, drejtuar Kolegjit Zgjedhor për të përshpejtuar ankimimin e PS, tashmë është vendosur që seanca të zhvillohet më 29 mars.
