Ambasada amerikane në Tiranë u bën apel shtetasve të saj në Shqipëri të jenë të kujdesshëm gjatë ditës së shtunë, kur në kryeqytet do të zhvillohet një protestë e opozitës. Duke qenë se nuk ka një skenar të zbardhur se si do të zhvillohet kjo protestë, Ambasada u ka bërë thirrje qytetarëve që të tregojnë kujdes, referuar edhe demostratave të së kaluarës ku janë regjistruar edhe akte dhune.
"Një demonstratë pritet të zhvillohet para Kryeministrisë. Grupi i demonstruesve mund të protestojnë në disa pika. Nuk dihet orari i përfundimit të demonstratës. Në demonstratat e mëparshme ka pasur dhunë. 'Policia ka përdorur ujë dhe gaz lotsjellës për të zmbrapsur turmën", shkruan Ambasada.
Kjo është protesta e gjashtë kombëtare e opozitës së bashkuar. Më herët kreu i Partisë Demokratike, Lulzim Basha ka deklaruar se nuk do të bëjë "asnjë hap pas", në atë që ka qenë si "motoja" e këtyre protestave, një Shqipëri si e gjithë Europa. Në total, opozita ka zhvilluar gjithsej 13 protesta.
Komente
