E dalë e dërrumuar nga zgjedhjet e 11 Majit, me mandatin e katërt në opozitë, me një lider të shpallur ‘non grata’, i cili nuk pranon të hapë rrugë, duke e lënë partinë e tij rrugëve, Partia Demokratike e Shqipërisë duket se ka një mal të madh me halle, të cilat vetëm duke filluar të fliste për to mund edhe t’i lehtësonte ndopak dhe mund të gjente ndonjë zgjidhje për të ecur përpara.
Në vend që të merret me hallet e veta, PD-ja dhe eksponentët e saj, kanë zgjedhur të merren me “hallet” e Amerikës.
Dhe të merresh sot me “hallet” e SHBA-ve nuk do të thotë që t’i shtosh hallet vetes. Jo, thjesht të lë të kuptosh që nuk do të merresh me hallet e tua dhe i largohesh atyre, duke krijuar diskutime të kota, të cilat, mbi të gjitha, nuk ndikojnë fare në zhvillimet politike në vend.
Drejtori i komunikimit në PD, deputetë të kësaj force në daljet e tyre të fundit, por edhe vetë lideri i shpallur ‘non grata’, i cili, pavarësisht përpjekjes me dollarë dhe ‘pi-arë’, për të krijuar një realitet inekzistent, vijon të konsiderohet i padëshirueshëm edhe nga administrata Trump, po mundohen të ‘zbresin’ në Shqipëri debatin mes Trump dhe Soros në SHBA, duke dashur të krijojnë idenë se pas ‘arrestimit’ të Sorosit (në mos atit, të birit) radhën e ka Edi Rama. Pra, ata po thonë se grupi i gatshëm i FBI-së amerikane, sapo të mbarojë punë me Sorosin, do 'lajë duart' dhe me Ramën dhe, me këtë rast, këta do vijnë në pushtet dhe shqiptarëve do t'u sosen hallet dhe problemet.
Me këtë qasje përveçse një grupi të vogël militantësh rreth tyre, nuk bindin asnjë.
Por, përveç kësaj, kjo ‘derexhe’ në të cilën vijojnë ta katandisin Partinë Demokratike, duke krijuar realitete bipolare dhe duke u mundur të manipulojnë vetëm ata që kanë në vathën e tyre, është dëmi më i madh që mund t’i bëhet opozitës.
Shqipëria ka mjaft halle, pushteti ka plot për të diskutuar dhe denoncuar, probleme të qytetarëve janë me qindra, te të cilat opozita mund të ndalet dhe të mbrojë interesin e tyre, mirëpo, kjo opozitë zgjedh të mos përballet me realitetin e saj dhe, si rrugë më të lehtë, merret me ‘hallet’ e Amerikës. E thënë ndryshe, e fut kokën si struci në këto diskutime, duke shpresuar se nuk po ‘e sheh’ kush. Në fakt, nuk e sheh askush, për shkak se nuk kanë kurrfarë interesi te shqetësimet që ngre kjo opozitë. Njerëzit kanë halle të tjera nga 'hallet' e kësaj opozite./TemA
Komente
