Në prag të vizitës në Kinë, presidenti rus Vladimir Putin kritikoi ashpër sanksionet perëndimore, ndërsa ekonomia e vendit të tij ishte në prag të recesionit, e dëmtuar nga kufizimet tregtare dhe kostoja e luftës në Ukrainë.
Rusia dhe Kina kundërshtuan së bashku sanksionet "diskriminuese" në tregtinë globale, tha Putin për agjencinë zyrtare të lajmeve Xinhua.
Udhëheqësi rus do të marrë pjesë fillimisht në samitin dy-ditor të Organizatës së Bashkëpunimit të Shangait (SCO) në qytetin portual të Tianjinit në veri të Kinës. SCO, e themeluar nga një grup vendesh euroaziatike në vitin 2001, është zgjeruar në 10 anëtarë të përhershëm që tani përfshijnë Iranin dhe Indinë.
Putini do të udhëtojë më pas për në Pekin për të zhvilluar bisedime me presidentin kinez Xi Jinping dhe për të marrë pjesë në një paradë ushtarake në kryeqytetin kinez, në përkujtim të Luftës së Dytë Botërore.
Në maj të këtij viti, Xi mori pjesë në një paradë ushtarake në Sheshin e Kuq të Moskës që shënonte 80-vjetorin e fitores së Bashkimit Sovjetik dhe aleatëve të tij mbi Gjermaninë naziste. Ishte vizita e 11-të e Xi në fqinjin gjigant të Kinës që kur u bë president më shumë se një dekadë më parë.
Rusia është goditur nga raunde të shumta sanksionesh perëndimore pas pushtimit të Ukrainës në vitin 2022. Presidenti i SHBA-së, Donald Trump, tha se mund të vendosë sanksione "masive" ndaj Rusisë në varësi të mundësisë së përparimit në përpjekjen e tij për të siguruar një marrëveshje paqeje.
“Për të përmbledhur, bashkëpunimi ekonomik, tregtar dhe industrial midis vendeve tona po përparon në fusha të shumta”, tha Putin për Kinën, të cilën Perëndimi e akuzon për mbështetjen e të ashtuquajturit operacion ushtarak special të Rusisë në Ukrainë.
"Gjatë vizitës sime të ardhshme, ne me siguri do të diskutojmë perspektivat e mëtejshme për bashkëpunim të dobishëm reciprokisht dhe hapa të rinj për ta intensifikuar atë në dobi të popujve të Rusisë dhe Kinës."
Kur vendet perëndimore i ndërprenë lidhjet me Rusinë pasi Moska nisi pushtimin e plotë të Ukrainës në shkurt të vitit 2022, Kina erdhi në ‘shpëtim’, duke blerë naftë ruse dhe duke shitur mallra nga makinat te elektronika, gjë që e çoi tregtinë dypalëshe në një rekord prej 245 miliardë dollarësh në vitin 2024.
"Kina ishte padyshim partneri kryesor tregtar i Rusisë për nga vëllimi dhe transaksionet midis vendeve kryheshin pothuajse tërësisht në rubla dhe juan", tha Putin teksa nënvizoi se Rusia ishte një eksportuese kryesore e naftës dhe gazit në Kinë dhe të dyja palët vazhduan përpjekjet e përbashkëta për të ulur barrierat tregtare dypalëshe.
Putin dhe Xi janë takuar mbi 40 herë gjatë dekadës së fundit.
I kërkuar nga Gjykata Ndërkombëtare Penale për akuzat për krime lufte të deportimit të paligjshëm të qindra fëmijëve nga Ukraina, Putin udhëtoi për herë të fundit në Kinë në vitin 2024./Reuters
Komente
Iku koha e unipolarizmit por vendet perendimore nuk duan ta pranojne kete fakt por me kalimin e kohes do ta kuptojnee qe bota ka ndryshuar krahe
Përgjigju