Presidenti kinez Xi Jinping do të zhvillojë një vizitë zyrtare në Rusi më 9 maj dhe do të marrë pjesë në ceremonitë për përvjetorin e Ditës së Fitores. Këtë e ka njoftuar presidenti rus, Vladimir Putin.
“Dëshiroj t’ju kërkoj t’i përcillni përshëndetjet e mia të përzemërta presidentit të Republikës Popullore të Kinës, mikut tim të dashur Xi Jinping. E presim atë në Rusi me rastin e 80-vjetorit të fitores në Luftën e Madhe Patriotike,” tha Putin gjatë takimit me ministrin e Jashtëm kinez, Wang Yi, në Moskë.
“Së bashku do të festojmë këtë përvjetor dhe fitoren ndaj Gjermanisë naziste si dhe fitoren ndaj Japonisë militariste,” shtoi lideri i Kremlinit.
“Do të përgatisim një program të pasur dhe shpresoj që kjo të mos lidhet vetëm me pjesëmarrjen në ceremonitë përkujtimore, por të jetë gjithashtu një vizitë e veçantë e presidentit kinez. Ai do të jetë i ftuari ynë kryesor,” vuri në dukje Putin.
Lideri rus bëri të ditur gjithashtu se dëshiron të diskutojë me Xi gjendjen e marrëdhënieve dypalëshe dhe bashkëpunimin në forumet ndërkombëtare, përfshirë OKB-në, Organizatën për Bashkëpunim të Shangait (SCO) dhe grupin BRICS.
Komente
