Presidenti rus, Vladimir Putin, ka deklaruar se Rusia nuk ka nevojë për asgjë që i përket të tjerëve, por nuk do të heqë dorë nga ajo që është e saj.
Deklarata u bë gjatë një takimi me punonjësit e fondacionit “Mbrojtësit e Atdheut”, siç raporton Ria Novosti.
Putin theksoi se Moska nuk do të bëjë lëshime në lidhje me operacionin ushtarak special në Ukrainë. Sipas tij, Rusia kërkon një marrëveshje paqeje që të jetë e pranueshme dhe që të garantojë sigurinë e saj në një perspektivë historike.
Putin gjithashtu ka vënë në dukje se luftëtarët e Brigadës 810 janë aktualisht të angazhuar në operacione të rëndësishme ushtarake, duke çliruar “pjesë-pjesë” rajonin rus të Kurskut, i cili ka qenë skenë e një ofensive ukrainase që nga vera e kaluar.
"Brigada 810 është legjendare. Aktualisht, ata po luftojnë në një drejtim shumë të rëndësishëm në rajonin e Kurskut. Pavarësisht kushteve të vështira, ata po përparojnë dhe po kryejnë misione luftarake çdo ditë," u shpreh presidenti rus.
Sipas tij, ushtarët rusë janë duke përmbushur detyra shumë të ndërlikuara dhe vazhdojnë të çlirojnë territoret ruse hap pas hapi.
"Në këtë moment, ata po luftojnë dhe po përmbushin misione të vështira luftarake, duke e çliruar tokën tonë çdo ditë", përfundoi Putin.
Putin iu përgjigj edhe deklaratave të presidentit francez Emmanuel Macron, i cili tha se Evropa duhet të dyfishojë investimet në armatim.
"Ka njerëz në botë që duan të kthehen në kohët e fushatës së Napoleonit, por ata harrojnë se si përfundoi. Të gjitha gabimet e armiqve tanë filluan këtu: nënvlerësimi i karakterit të popullit rus," tha më tej Vladimir Putin.
Komente
