Gjykata e Kukësit pranoi sot kërkesën e Prokurorisë për caktimin e masës së sigurisë, burg pa afat për gjashtë shtetasit sirian, të cilët u arrestuan tre muaj më parë në kufirin me Kosovën, pasi qëlluan me armë drejt efektivëve shqiptarë.
Sipas Prokurorisë së Kukësit, të arrestuarit, 5 sirianë dhe 1 algjerian akuzohen për vrasje të punonjësve të policisë e mbetur në tentativë, prodhim dhe mbajtje pa leje e armëve e municioneve dhe kalim të paligjshëm të kufirit.
Sot ishte afati i fundit i ezaurimit të masës arrest me burg për periudhën tre mujore, ndërkohë që Prokuroria e Kukësit kërkoi caktimin e masës së arrestit, burg pa afat.
Arrestimi i shtetasve sirianë u bë më datën 26 maj 2023, gjatë tentativës së tyre për kaluar kufirin mes Shqipërisë dhe Kosovës, ku trafikantë klandestinësh nga vendet e lindjes së mesme qëlluan në drejtim të oficerëve shqiptarë.
Në aksionin e përbashkët të dy vendeve pati shkëmbime zjarri e për pasojë një polic i kufirit mbeti i plagosur në këmbë.
