Policia arrestoi drejtuesen teknike e punimeve të pallatit në Qerret të Kavajës, ku dje humbi jetën një punëtor 59-vjeçar. 68-vjeçarja me banim në Tiranë akuzohet për shkelje të rregullave të mbrojtjes në punë.
Në kërkim për ngjarjen është shpallur administratori i firmës, njëkohësisht sipërmarrësi i punimeve dhe një inxhinieri ndërtimi i kompanisë.
Punëtori 59-vjeçar u rrëzua gjatë çmontimit të skelave të ndërtimit në pallat. I lënduar ka mbetur edhe një tjetër punëtor që u godit nga rënia e trarëve.
Njoftimi i policisë:
Në përfundim të veprimeve të para hetimore të kryera në lidhje me ngjarjen e djeshme ne fshatin Qerret/Kavaje ku humbi jetën shtetasi H. P., 59 vjeç, duke punuar gjatë çmontimit të një skele dhe u dëmtua në këmbë shtetasi S. H., 36 vjeç, në një pallat në ndërtim, Specialistët për Hetimin e Krimeve të Komisariatit të Policisë Kavajë arrestuan në flagrancë shtetasen E. Xh., 68 vjeçe, banuese në Tiranë, me detyrë drejtuese teknike e punimeve.
Po në lidhje me ngjarjen, në përfundim të hetimeve të para u bë shpallja në kërkim për veprën penale "Shkelja e rregullave të mbrojtjes në punë" e shtetasit E. D., 53 vjeç, banues në Golem, Kavajë, me detyrë administrator i firmës dhe njëkohësisht sipërmarrës i punimeve ne pallat, dhe e shtetasit M. Sh., 31 vjeç, banues në Tiranë, me detyrë inxhinier i kompanisë së ndërtimit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.
Komente
