Qeveria ka miratuar dhe do të depozitojë në Kuvend një projektligj për Albcontrol, një emërtim i ri që do të zëvendësojë shoqërinë aksionere “ALBCONTROL”, sh.a, e cila prishet sipas draftit të qeverisë pa kaluar në likuidim. Ligji parashikon që të gjitha të drejtat, detyrimet dhe pasuritë e shoqërisë “ALBCONTROL”, sh.a., i transferohen Albcontrol-it. Nuk dihet nëse ky ligj ka lidhje me bllokimin e llogarive të “ALBCONTROL”, sh.a, dhe nëse synohet me emërimin si subjekt të ri shmangia e këtij bllokimi.
Ligji do të titullohet “Për ofruesin e shërbimeve të lundrimi ajror Albcontrol” dhe ka si objekt përcaktimin e formës së organizimit, të rregullave të funksionimit dhe të administrimit të këtij institucioni si dhe të shërbimeve që ofron. Sipas këtij ligji Albcontrol-i do të jetë një ent publik, jobuxhetor, veprimtaria e të cilit përbën shërbim publik dhe kryhet nën mbikëqyrjen e ministrit përgjegjës për çështjet e transportit ajror, në rastin aktual Ministria e Infrastrukturës. Ligji parashikon që Albcontrol të gëzojë pavarësi drejtuese, administrative, teknike dhe financiare.
Shërbimet e ofruara
Shërbimet që do të ofrojë Albcontrol-i janë: Menaxhimin e trafikut ajror; Shërbimet e komunikimit, të lundrimit dhe mbikëqyrjes; Shërbimet e informacionit aeronautik; Shërbimet meteorologjike për lundrimin ajror; Shërbimet e hartimit të procedurave të fluturimit.
Organet drejtuese
Sipas projektligjit të miratuar në qeveri Albcontrol do të ketë si organe drejtuese Këshillin Drejtues dhe Drejtorin e Përgjithshëm. Këshilli Drejtues është organi më i lartë vendimmarrës i Albcontrol-it dhe përbëhet nga 5 anëtarë, të ciëlt emërohen nga ministri, sipas një procedure përzgjedhjeje të bazuar në parimin e transparencës e të meritokracisë.
Sa i përket kompetencave të Këshillit Drejtues mund të përmenden si më të rëndësishme: Miraton drejtimet kryesore të veprimtarisë së Albcontrol-it; Miraton statutin e Albcontrol-it dhe rregulloren e brendshme; Mbikëqyr administrimin dhe veprimtarinë e Albcontrol-it; Miraton numrin e punonjësve të Albcontrol-it dhe nivelin e pagave e të shpërblimeve; Miraton programin ekonomik vjetor dhe e paraqet për aprovim te ministri; Propozon te ministri kandidaturën për drejtor të Përgjithshëm i Albcontrol-it. Drejtori i Përgjithshëm është autoriteti më i lartë ekzekutiv dhe përfaqësuesi i Albcontrol-it. Ai emërohet nga ministri, sipas një procedure përzgjedhjeje të bazuar në parimin e transparencës e të meritokracisë.
Burimet e financimit
Albcontrol-i nuk është subjekt fitimprurës dhe burimet e financimit të tij sipas draftit janë fondet e përfituara nga tarifat e ofrimit të shërbimeve të lundrimit ajror në rrugëkalim (en-route) dhe nga tarifat e ofrimit të shërbimeve të lundrimit ajror në aerodrome, për nisjen dhe mbërritjen e fluturimeve; fonde të buxhetit të shtetit, në raste të jashtëzakonshme dhe kur veprimtaria e Albcontrol-it cenohet nga shkaqe të pavarura prej tij.
