Qofte frikase
Përbërësit:
- 500 gr mish i grirë
- 150 gr tul buke
- 1-2 qepë
- 2-3 lugë majdanoz
- 2 të verdha veze
- Djathë të grirë
- Kripë, piper, dhjozmë
- Vaj /Gjalpë për skuqje
Për salcën:
- 400 gr qepë
- 1 fk uthull të bardhë
- 2 të verdha veze
- 1-2 lugë gjalpë
- Qumësht
Përgatitja:
Bashkojmë përbërësit e qofteve në një tas dhe formojmë brumin, e lëmë pak të pushojë dhe më pas realizojmë qofte të vogla sa një kokërr gështenje dhe i skuqim lehtë duke u kujdesur të mos thahen tepër. Ndërkohë grijmë shumë hollë qepët (rreth 400 gr), i vëmë të marrin një valë me ujë, i kullojmë dhe i vendosim të ziejnë përsëri me ujë tjetër (aq ujë sa të lundrojnë qepët në të) në të cilin hedhim uthullën, pak kripë e një lugë gjelle gjalpë. E mbulojmë tenxheren dhe i lëmë të ziejnë qepët derisa të treten pothuajse fare dhe të mbetet aq lëng sa të mjaftojë për t'u bërë me të një salcë e ujshme. Përziejmë dy të verdhat e vezëve me qumështin, me gjysmë lugë miell, rregullojmë pak temperaturën me lëngun e salcës dhe e përziejmë mirë duke e shtuar më pas sipër qofteve, duke e tundur e shkundur pak tenxheren në zjarr. E lëmë gatimin të marrë 2-3 valë, e largojmë nga zjarri dhe e servirim në një pjatancë të thellë.
