Raketat amerikane 'Javelin' pritet që të mbërrijnë shumë shpejt në Kosovë.
Këtë e ka bërë të ditur ministri i Mbrojtjes në Kosovë, Ejup Maqedonci në një intervistë për KosovaPress, i cili sqaroi se tashmë janë kthyer pagesat sipas planit dhe sistemet e konsideruara tejet efikase, do të jenë brenda pak kohësh në inventarin e FSK-së.
Më tej, ai theksoi po ashtu se Kosova tashmë zotëron sistemin e raketave turke “OMTAS” që është i ngjashëm me atë “Javelin”.
Ministri shtoi se qeveria Kurti në tri vitet e fundit ka investuar rreth 240 milionë euro në blerje të sistemit të armatimit.
Teksa u ndal tek anëtarësimi i Kosovës në NATO-së, Maqedonci tha se anëtarësimi në NATO është nevojë urgjente për sigurinë e Kosovës.
Sipas tij, Kosova ka bërë hapa të mëdhenj në aspektin e përgatitjes së saj për të qenë pjesë e aleancës veri-atlantike, ndërsa tha se avancimi i statusit të Kosovës në Asamblenë Parlamentare të NATO-s, do të ndihmojë në arritjen e këtij qëllimi madhor për vendin.
