Vitin e kaluar, kryeministri Edi Rama njoftoi planet për krijimin e një shteti sovran bektashian brenda kufijve të Shqipërisë, i cili do të drejtohet nga komuniteti bektashi me rreth 100,000 anëtarë, shkruan AFP në një artikull dedikuar Shtetit Bektashi, ndërsa në intervistë ka marrë edhe Baba Mondin.
"Shteti ynë do të jetë një shtet shpirtëror dhe administrativ shumë i vogël... por me një zemër të madhe," deklaroi Kryegjyshi Botëror i Bektashinjve, Baba Mondi, në një intervistë për AFP në Tiranë. I veshur me një tunikë të bardhë, xhaketë dhe qeleshe të gjelbër, me fytyrën e rrethuar nga një mjekër e bardhë e gjatë, ai theksoi: "E gjithë bota do të mund të shohë dritën e bektashinjve."
Krijimi i një shteti fetar në Shqipëri do të ishte i paimagjinueshëm gjatë diktaturës komuniste të Enver Hoxhës, kur feja u ndalua dhe klerikët u persekutuan. Qindra klerikë nga të gjitha besimet u ekzekutuan, u burgosën ose u dëbuan, ndërsa vendet e kultit u shkatërruan.
Por që nga rënia e regjimit komunist në fillim të viteve '90, shprehja fetare është rigjallëruar në shumë zona të vendit. Sot, bektashinjtë renditen si komuniteti i katërt fetar më i madh në Shqipëri, pas myslimanëve sunitë, ortodoksëve dhe katolikëve.
Një shtet pa ushtri, polici apo taksa
Megjithëse detajet administrative dhe data e saktë e shpalljes së shtetit të ri mbeten ende për t'u përcaktuar, Baba Mondi ka vizion të qartë për të ardhmen e tij.
"Kjo shtetësi nuk do të ketë polici, as ushtri, as taksa; do të jetë një shtet shpirtëror," shpjegon ai. "Qëllimi i tij do të jetë organizimi dhe mbrojtja e bektashinjve në mbarë botën."
Po ashtu, ai synon që ky shtet të mbrojë të drejtat e bektashinjve të persekutuar në vende ku nuk u lejohet të praktikojnë besimin e tyre, si në Turqi apo Iran.
Mikro-shteti bektashian do të vendoset në truallin ku aktualisht ndodhet selia e këtij komuniteti në Tiranë dhe do të shtrihet në një sipërfaqe prej vetëm 0.11 kilometra katrorë, duke e bërë vendin më të vogël në botë. Për krahasim, Vatikani – i cili aktualisht mban këtë rekord – ka një sipërfaqe prej 0.44 kilometra katrorë.
Paqe dhe dashuri
Urdhri bektashian u themelua në shekullin e XIII në Perandorinë Osmane dhe konsiderohet si një degë mistike dhe tolerante e Islamit, e hapur ndaj feve dhe filozofive të tjera.
Disa nga liderët e tij kryesorë u vendosën në Shqipëri pas ndalimit të këtij besimi në Turqi nga Mustafa Kemal Ataturku në fillim të shekullit XX.
Ndryshe nga degët më konservatore të Islamit, bektashinjtë i lejojnë burrat dhe gratë të luten bashkë dhe nuk ndalojnë konsumimin e alkoolit. Madje, sipas Baba Mondit, rakia – pija tradicionale e Ballkanit – është pjesë e kulturës së tyre.
"Rakia, ashtu si qumështi i nënës, ka vlera sepse shkon direkt në tru pa kaluar në stomak," tha ai me humor.
Për bektashinjtë, harmonia dhe toleranca janë thelbësore. "Ne kemi qenë gjithmonë një urë lidhëse mes Lindjes dhe Perëndimit, një model se si mund të bashkëjetojmë me dashuri, paqe dhe mirësi," theksoi ai.
Për kryeministrin Rama, krijimi i këtij shteti të veçantë është gjithashtu një përpjekje për të mbrojtur tolerancën fetare në Shqipëri. "Duhet të kujdesemi për këtë thesar të çmuar që është harmonia fetare, ta ruajmë dhe ta promovojmë," deklaroi ai gjatë një fjalimi në janar, me rastin e 95-vjetorit të zhvendosjes së selisë bektashiane nga Turqia në Shqipëri. Megjithatë, Rama nuk ka dhënë ende një afat konkret për zbatimin e këtij projekti, ndërsa për Baba Mondin dhe ndjekësit e tij sufi, e ardhmja duket plot mundësi.
Komente
Pa taksa por me banka" Zvicra" per parate e korrupsionit( pa taksa)
PërgjigjuShtet pa taksa se do i hedhin leket ne vakef…..
Përgjigju