Kryeministri Edi Rama ka falënderuar kryetaren e Komunës së Preshevës, Ardita Sinani, për urimin që ajo i ka dërguar me rastin e fitores së tij në zgjedhjet e përgjithshme.
Në një letër publike, Rama vlerëson angazhimin dhe përkushtimin e Sinanit në drejtimin e Komunës së Preshevës dhe thekson se bashkëpunimi mes Tiranës zyrtare dhe shqiptarëve në Luginë do të vijojë të forcohet.
Letra e plotë e kryeministrit Edi Rama:
“E nderuar zonja Sinani,
Ju falënderoj përzemërsisht për urimin Tuaj aq të ngrohtë e miqësor me rastin e fitores në zgjedhjet e përgjithshme politike për një mandat të ri qeverisës.Duke Ju përcjellë këtë mesazh falënderimi, unë kam rastin e duhur të shpreh gjithë vlerësimin tim për angazhimin dhe përkushtimin Tuaj në krye të Komunës së Preshevës, në mirëqeverisjen e qytetarëve të saj dhe në mbrojtjen e avancimin e të drejtave të shqiptarëve në Luginën e Preshevës.
Dua t'Ju siguroj se bashkëpunimi ynë do të vazhdojë të rritet e forcohet, si shprehje e vëmendjes dhe përkujdesjes së Qeverisë shqiptare ndaj shqiptarëve në Luginën e Preshevës dhe angazhimit të saj të qëndrueshëm në mbrojtjen dhe përparimin e të drejtave të tyre, si edhe në rritjen dhe forcimin e zhvillimit ekonomik dhe standardit jetësor të shqiptarëve në Luginë.
Edhe një herë, me urimet e mia më të mira për Ju dhe me besimin se në një kohë të përshtatshme do të jem përsëri mes qytetarëve të Preshevës, pranoni Ju lutem, shprehjen e konsideratës sime më të lartë.”
Komente
