Akuzave të hedhura nga radhët e PD-së se kryeministri Edi Rama ka vjedhur programin e PD i është bashkuar edhe ish-deputeti i PD-së, Ervin Salianji.
Edhe pse në burg, nëpërmjet një reagimi në profilin e tij në Facebook, shkruan se Edi Rama vodhi programin e PD-së për t’i paraqitur si ide të tijat në fushatën aktuale zgjedhore.
‘Kur jemi pak ditë para zgjedhjeve të 11 majit, me gjasë do të nisin siç ka ndodhur shpesh, deklarimi haptazi i votës. Kuptohet se për Opozitën ka ndrojtje për ta shpallur, duke qenë se njihet sa malinje, hakmarrëse e represive është qeveria. Por, për habinë e të gjithëve, vota e parë që u manifestua pro PD, erdhi nga ai që pritej më pak. Nga Edi Rama. Ai jo vetëm është dakort me programin e demokratëve, por do të bënte dhe ai të njëjtën gjë. Paraqiti autokratuci si ide të tijat, fije për pe, propozimet e opozitës. Pra ai është tërësisht dakort me minimumin jetik 200 euro, me rritjen e pensioneve mbi këtë bazë, me pagën minimale 500 euro, me pagën mesatare 1200 euro. A mund të gjente PD e Sali Berisha zëdhënës më të mirë për platformën e tij se dikë që ka aksesin e Edi Ramës në media? Vështirë se mund ta gjente. Shefi i Rilindjes u ka thënë atyre të radhëve të tij, që ta përkrahin programin e PD’, shkruan ai.
Ndër të tjera, Salianji shkruan se modeli i qeverisë janë kullat, të cilët sipas tij, sjellin vetëm pasurimin e një grupi njerzish.
‘Projekti i PD është totalisht i realizueshëm. Edhe më skeptikët edhe të majtët e dinë mirë se nëse është fjala për të bërë këtë përmbysje në paga e pensione, në zhdukjen e varfërisë, do t'i besonin jo atij që e solli këtë gjendje deri këtu, e që pati 3 mandate kohë për ta korigjuar e kurrë nuk e bëri, por do t'i besonin atij që edhe në të shkuarën e ka jetësuar këtë transformim. Me shpalljen e gjasme programit, Edi Rama shtoi dhe një metër në fasadën e tij, asgjë më shumë.
Pasi në realitet, ai po e tregon çdo ditë se modeli i tij janë kullat, kullat, dhe kullat. Këto ngrehina, pasurojnë një grusht njerëzish edhe më shumë, fusin para të pisëta në kate të larta, por nuk sjellin asgjë për njerëzit, për ekonominë. Pensionet e pagat nuk rriten me grataçela, as me resorte. Ato rriten me rritjen e ekonomisë, me çlirimin e tregut, me hapjen e garës, me taksën e sheshtë, me thjeshtimin e burokracisë’, shkruan ai.
Komente
