Tashmë që Buxheti 2025 ka kaluar në parlament me votat e mazhorancës, Kryeministri Edi Rama pohoi sot (6 Dhjetor) se 164 mijë persona me aftësi të kufizuara në Shqipëri do të kenë mbështetje vitin e ardhshëm.
Në një postim në rrjetet sociale, kreu i qeverisë nënvizon se Programi i Mbrojtjes Sociale synon të përmirësojë cilësinë e jetës për këta qytetarë, duke u ofruar jo vetëm ndihmë ekonomike, por edhe mbështetje për përfshirjen sociale dhe akses në shërbime të specializuara.
Edhe në mbledhjen e qeverisë së tre ditëve më parë, ishte ministrja e Shëndetësisë dhe Mbrojtjes Sociale, Albana Koçiu, që njoftoi vendimet e Këshillit të Ministrave, edhe për lajmin në fjalë.
Ajo tha më 4 Dhjetor se Qeveria do të rrisë mbështetjen financiare për personat me aftësi të kufizuar, të grupit para dhe tetraplegjik. Rritja prej 4 mijë lekësh do të aplikohet në paketën higjeno-sanitare për mbulimin e domosdoshëm me materiale, duke shkuar nga 16 mijë në 20 mijë lekë. Mbështetje, qeveria do të japë edhe për kujdestarët e personave me aftësi të kufizuar, të cilëve do tu paguhet paga dhe sigurimet shoqërore.
Postimi i kryeministrit Edi Rama:
“164 mijë persona me aftësi të kufizuara në Shqipëri do të kenë mbështetje në buxhetin2025. Programi i Mbrojtjes Sociale synon të përmirësojë cilësinë e jetës për këta qytetarë, duke u ofruar jo vetëm ndihmë ekonomike, por edhe mbështetje për përfshirjen sociale dhe akses në shërbime të specializuara. Punojmë për një Shqipëri me më shumë dinjitet e humanizëm”.
Komente
