Kryeministri Edi Rama ka dhënë një intervistë për "Corriere Della Sera" gjatë vizitës në Itali, ku ka folur për integrimin europian, ku nuk heziton të shpreh edhe një herë zhgënjimin për ngecjen e negociatave për shkak të vetos së Bullgarisë që i ka vendosur Maqedonisë së Veriut. Rama theksoi se vendi i ka bërë detyrat dhe se përparimi me reformat vijon për të mirën e Shqipërisë.
Rama foli edhe për Ballkanin Perëndimor ku tha se është në dorë të vendeve të vendosin bashkëpunim të suksesshëm që rajoni të mos bie në kurthet e së kaluarës.
Ai gjithashtu vlerësoi marrëdhëniet e shkëlqyera me Italinë, ndërsa theksoi rëndësinë e përshpejtimit të procedurave të njohjes së pensioneve të shqiptarëve që prej vitesh kontribuojnë për shtetin italian.
ARTIKULLI I PLOTË I 'CORRIERE DELLA SERA'
Më shumë se një ish-basketbollist, Edi Rama dje dukej si një maratonist. I mbërritur për 24 orë në Romë, së bashku me gjysmën e qeverisë shqiptare, kryeministri e nisi ditën në Palazzo Chigi ku pati, sipas tij, privilegjin që të takonte homologun Mario Draghi, një personazh që, siç thotë ai, ka dalë nga faqet më të mira të historisë politike të Evropës, shkruan Monica Ricci Sargentini për gazetën më prestigjioze italiane “Corriere della Sera” (CDS).
Më pas, Rama e përfundoi takimin me Komitetin e Përbashkët të Bashkëpunimit mes Italisë dhe Shqipërisë, ku mori pjesë edhe ministri i Jashtëm italian Luigi Di Maio.
Megjithatë, i ulur në ambientet e hotel “Splendide Royal” për intervistën me “Corriere della Sera”-n duket se Rama lë të shfaqet një hije zhgënjimi për ngërçin e negociatave për hyrjen e Shqipërisë në Bashkimin Evropian.
“Është një moment i vështirë, pasi kriza e refugjatëve e vitit 2015 shpërtheu një valë populiste, viktima e parë e së cilës ishte procesi i zgjerimit të BE-së. Frika nuk është kurrë një këshilltare e mirë. Ne kemi bërë detyrat tona të shtëpisë. Tani fillimi i negociatave varet nga Bullgaria dhe nga efektiviteti i shtytjes së brendshme të vendeve të tjera. Por, nuk bëhet fjalë për jetë apo vdekje. Reformat bëhen sepse i nevojiten Shqipërisë, për të ndërtuar Shqipërinë moderne”, thotë Rama.
CDS: Sapo mbërritët në Itali thatë se “po vij në shtëpinë tjetër timen”. Cilat janë perspektivat e bashkëpunimit mes dy vendeve?
Rama: Tridhjetë vjet më parë mbërritëm në brigjet italiane me varka si alienët, por që atëherë ndryshimi ka qenë i pabesueshëm, pasi sot shqiptarët janë integruar plotësisht në Itali dhe ne kemi shumë biznese italiane në Shqipëri. Megjithatë, ne duhet të përshpejtojmë çështjen e pensioneve për shumë nga bashkatdhetarë tanë që kanë punuar për vite në vendin tuaj dhe që paguajnë kontribute në thesarin italian. Kam folur për këtë me Draghin.
CDS: Kosova, Maqedonia e Veriut, Mali i Zi dhe Serbia. Si janë marrëdhëniet?
Rama: Asnjëherë nuk kanë qenë më të mira, sigurisht që ka probleme si ai i njohjes së Kosovës nga Serbia, por mendoj se mund të ndërtojmë një rrugë të përbashkët. Pastaj varet nga ne nëse do të kemi sukses apo nëse duam të biem në kurthet e së kaluarës.
CDS: Ju jeni mbrojtës i rregullimit të përdorimit të mediave sociale, por a nuk cenon kjo lirinë e shprehjes?
Rama: Një rregullim është i nevojshëm, boll të shohësh se si kanë ndikuar këto vitet e fundit, nuk janë demokracitë që dalin të forta, por regjimet autokratike, imagjinoni se çfarë do të bënte sot propaganda naziste nëse do të kishte mediet sociale.
CDS: Në mars 2020, kur këtu në Itali shpërtheu pandemia, ju dërguat një ekip mjekësh dhe infermierësh, ndërsa këtë vit hapët dyert për refugjatët afganë. Ju jeni me të vërtetë një vend bujar.
Rama: E vërteta është se ne kemi një kujtesë që e ruajmë sepse nuk jemi mjaft të pasur. Italia ka bërë aq shumë për ne, sa edhe dy jetë nuk do të mjaftonin për ta falënderuar, ata pak mjekë sigurisht që nuk e kanë ndryshuar rrjedhën e luftës kundër Covid-it, por kanë mundur të tregojnë se edhe ne e përjetojmë dhimbjen tuaj. Sa për afganët, ne jemi një vend anëtar i NATO-s dhe ishte më e pakta që mund të bënim për njerëzit që ata besuan tek ne dhe punuan për ne.
Intervista në gazetën 'Corriere della Sera'
Komente
Grande Rama! Grazie Italia!
Përgjigju