Kreu i qeverisë trajtoi në fund të fjalës së tij edhe çështjen e pronave të ushtrisë, për të cilat theksoi se ende janë kaotike dhe duhen vënë në funksion të investimit dhe zhvillimit për qëllime të ngjashme siç veprojnë edhe vendet e përparuara të NATO-s, duke ndjekur modelin e tyre.
Edi Rama tha se ushtria shqiptare u zhvesh nga pronat, të cilat ia morën ndër vite, kurse ato që janë nuk shfrytëzohen në pjesën më të madhe.
“Edhe në aspektin e pronave të ushtrisë u bë një hap i rëndësishëm, sepse për një kohë të gjatë ushtria shqiptare u zhvesh nga pronat, në mënyrë spontane, të pakuptueshme, kaotike dhe nga ana tjetër ka shumë prona që janë atje dhe nuk vihen në punë, nuk investohen. Ministria e Mbrojtjes duhet të bëhet qendër edhe e këtij aspekti, e zhvillimit të pronave që nuk përdoren vetëm për qëllime ushtarake, por janë të Mbrojtjes.
Të bëjmë siç veprojnë shtetet e tjera të NATO-s, e jo duke i dhënë për hiçasgjë, por të zhvillohen dhe nëpërmjet tyre të marrim të ardhura, pasi i shërbejnë edhe buxhetit. Ky sektor ka potencial për të bërë më shumë për ushtrinë, për mënyrën se si i administrojmë taksat e shqiptarëve, për të krijuar një bazë prodhuese, administruese dhe që të jetë pikë referimi kombëtar dhe aset”, tha kreu i qeverisë, teksa e mbylli fjalën edhe me një batutë me ushtarakët që kishin dalë në fundjavë për këtë takim dhe faktin se politikanët “vetëm kur hapin frigoriferin nuk u dalin përpara”, siç dalin në media çdo ditë e orë.
Lajmi kryesor:
16 vjet në NATO/ Rama: Dhjetëfishuam investimet në ushtri, e zhytën në humnerë dhe i kthyen kurrizin! Pagat e FA i çojmë sa mesatarja e NATO-s
A.Q/E.H/ReportTv.al
