TIRANË- Kryetarja e Lëvizjes Socialiste për Integrim, Monika Kryemadhi ka reaguar pas deklaratës së kryeministrit Edi Rama për raportin e Departamentit Amerikan të Shtetit për Shqipërinë. Duke përdorur shprehjen popullore “peshku qelbet nga koka”, Kryemadhi shkruan se do ishte përkufizimi shqip i raportit të DASH për vendin tonë.
Ajo thekson se raporti i DASH është skaner i arsyeve të krizës institucionale, ekonomike dhe të shpopullimit masiv, që ndikohen drejtpërdrejtë nga keqqeverisja e organizatës së strukturuar kriminale të inceneratorëve.
“Peshku qelbet nga koka, do të ishte përkufizimi troç e shqip i raportit të DASH për Shqipërinë. E kam lexuar me shumë shqetësim çdo gjetje, që nga zgjedhjet me probleme, korrupsioni në çdo qelizë të qeverisjes, mungesa e pavarësisë së gjyqësorit edhe pas reformës në drejtësi, e deri tek kufizimi i lirive e të drejtave themelore. Përtej çdo justifikimi, raporti i DASH është skaner i arsyeve të krizës institucionale, ekonomike dhe të shpopullimit masiv, që ndikohen drejtpërdrejtë nga keqqeverisja e organizatës së strukturuar kriminale të inceneratorëve. E kuptueshme që qeveria e fasadave nuk i pëlqen raportet faktike por deklaratat propagandistike, ndaj i ftoj të lexojnë edhe deklaratën e sotme që zyrtari i INL ka bërë në Tiranë për aferën e inceneratorëve dhe pastrimin e parave të pista në ekonominë e Rilindjes”, shkruan Kryemadhi.
Edhe për vitin 2021, korrupsioni dhe pandëshkueshmëria u raportuan si problemet kyçe në raportin vjetor të DASH për Shqipërinë. Lidhur me këtë raport, reagime pati edhe nga kreu i grupit parlamentar të PD-së, Enkelejd Alibeaj, sipas të cilit, konfirmoi atë që selia blu e thotë prej vitesh, që korrupsioni është i përhapur në të gjitha degët e qeverisë. Për raportin e DASH reagoi edhe deputeti i Rithemelimit Flamur Noka, i cili u bëri thirrje shqiptarëve të bëhen bashkë për të shporrur qeverinë e korruptuar të Edi Ramës.
Komente
