Raporti i Panelit Ndërqeveritar të OKB për Ndryshimin e Klimës, i bazuar në 6000 referenca shkencore, 91 autorë dhe recensues nga 40 vende të botës, bazuar në një literaturë të ngurtë shkencore, ka projektuar dy skenarë mbi ndikimin e ngrohjes globale, një i dëshirueshëm, me një nivel të ulët të emetimeve të gazrave serë dhe një tjetër katastrofik, jo aq i mundshëm, me rritjen e temperaturës midis 3.2 dhe 5.4 gradë Celsius.
Toka paguan një çmim shumë të lartë si pasojë e politikave jo miqësore ekologjike, me ambiente të brishta oqeanike që duhet të përballen me një seri kërcënimesh si pasojë e ndryshimit të klimës.
Sipas raportit të OKB, faktorët e rrezikut për shëndetin e planetit janë të ndryshëm. Veç rritjes së temperaturave do të ketë rritje të acidifikimit, ulje të sasive të oksigjenit në dete, shpeshtim i veprimtarisë së cikloneve dhe ulje të biodiversitetit detar.
Ëndrra e shumë njerëzve, ajo e të jetuarit në breg të detit, së shpejti mund të shndërrohet në një makth.
Nëse konfirmohen parashikimet e ekspertëve, vendet e Bashkimit Evropian do të vuajnë nga efektet e ngrohjes globale, duke filluar me rritjen e nivelit mesatar të detit. Një problem i rëndësishëm, duke pasur parasysh që rajonet bregdetare të Unionit janë të banuara nga 214 milion njerëz dhe gjenerojnë 43 përqind të Prodhimit të Brendshëm Bruto.
Pasoja pritet gjithashtu të ketë sektori i peshkimit, i cili siguron 4 milion vende pune dhe gjeneron 658 miliardë euro në vit. Ky sektor deri tani i vënë në provë nga shfrytëzimi intensiv, do të goditet rëndë si pasojë e uljes së vlerave të oksigjenit në ujrat detarë dhe rënia e sasive të peshkut dhe algave.
Këta faktorë do të shoqërohen me një tendencë ulje të biokompleksitetit dhe numrit të specieve detare, me pasoja të destinuara për të ndryshuar vetë idenë e mjedisit natyror.
Fotografia është alarmante por shkencëtarët gjithashtu propozojnë zgjidhje, përfshirë mbrojtjen e ekosistemeve të oqeanit, përdorimin e burimeve të rinovueshme dhe uljen e ndotjes.
Nga paneli i studiuesve e deri te të rinjtë që dolën në rrugë për të kërkuar reagime kundër krizës klimatike, ngrihet një apel me një emërues të përbashkët: është e nevojshme të veprohet shpejt sa nuk është tepër vonë.
Komente
